Na okashon di Dia di Mama Tera, gobièrnu di Boneiru ta pidi bo atenshon pa lo siguiente.
Nos no ta bai alkansá nos intentonan internashonal pa mantené kentamentu di mundu limitá te na 1,5 grado. A ménos si nos drenta den akshon inmediatamente i hasi tur loke ta den nos poder pa logra nos meta. Esaki ta konklushon di e rapòrt resien di e Panel Intergubernamental pa Kambio di Klima (Intergovernmental Panel on Climate Change – IPCC) di Nashonnan Uní.
Pa e motibu akí e tema di Dia di Mama Tera (Earth Day) dia 22 aprel 2023 ta: ‘Invertí den nos planeta’. Esaki ta un yamada urgente riba tur gobièrnu, empresa i suidadano. Invertí den un ekonomia bèrdè ta e úniko kaminda pa un futuro salú, próspero i hustu. Komo humanidat nos mes ta responsabel pa kentamentu di mundu. Pa e motibu akí nos tin ku rekuperá salú di nos planeta i konstruí un ekonomia bèrdè, ku kua nos ta protehá nos mes i ofresé oportunidat na tur hende. Esaki por solamente si nos invertí huntu den futuro di nos planeta. Gobièrnunan empresanan i suidadanonan mester tuma akshon i traha huntu pa vense kambio di klima.
Nos tin ku strukturá nos sistema di generá energia den un otro forma i kambia di kombustibel fósil pa energia di solo i energia di bientu. Na Boneiru nos ta saka mas òf ménos 22 porshento di nos nesesidat di energia for di energia di bientu. No muchu tempu pasá esaki tabata 40 porshento. Kresementu di poblashon i un demanda pa energia ku ta oumentando ta e kousa prinsipal pa e bahada akí. Pero tin vários plan pa trese kambio den esaki. Nos aspirashon ta pa oumentá e kuota di energia sostenibel te na 60 porshento. Aktualmente nos ta trahando un parke di panel solar di kasi 11.000 panel ku un kapasidat di 10 megawatt na e sentral di energia entre Karpata i Bopec. E parke solar akí por suministrá 5000 kas di famia ku koriente i e ta keda entregá e aña akí. Den e añanan binidero e kuota di energia di bientu tambe lo oumentá fuertemente.
Ya tin 13 empresa na Boneiru kaba ku tin un sertifikado di Blue Destination. A kuminsá ku e sistema di sertifikado akí pa yuda empresanan lokal hasi negoshi den un forma mas sostenibel i sosial. Pa medio di un ouditoria di su empresa, e empresario ta haña un bista di kon su empresa ta presta riba tereno di medio ambiente, naturalesa i sosiedat i na unda mehorashon ta posibel. Empresanan ku a haña e sertifikado ta usa ménos awa, nan ta produsí ménos shushi i nan ta emití ménos CO2. Entre e empresanan akí tin algun sentro di buseo ku ta funshoná kompletamente òf pa un gran parti riba energia di solo. Naturalmente esaki ta finansieramente atraktivo tambe.
Komo votadó i konsumidó kontinuamente habitantenan di Boneiru por insistí riba solushonnan sostenibel. Kombatimentu di kambio di klima i nos adaptashon na su konsekuensianan, por solamente si nos tur pone nos skoudernan bou di esaki.
Invertí den nos planeta i nos futuro konhunto!