E sector di cuido di salud di Sint Maarten lo ricibi un inversion significante den e añanan binidero dor di e Proyecto di Mehoracion di Servicio di Salubridad Mental cu e meta pa mehora e cadena di cuido di salud mental na un manera duradero. E proyecto lo busca pa mehora acceso y calidad di prestacion di servicio y contribui na construccion di un facilidad nobo di salubridad mental cu ta adapta na e demanda den futuro.
Reconociendo e necesidad urgente di un cuido di salud mental mas efectivo y accesibel, Minister di Salud Publico, Desaroyo Social y Labor (VSA) Omar Ottley ta contento cu e proyecto aki ta na caminda pa implementacion exitoso.
Salud mental ta un aspecto critico di nos bienestar general, y ta imperativo cu e sistema nacional di salud mental ta robusto y cu suficiente recurso pa atende e demanda creciente di servicio di salud mental. Pa medio di promove politica cu ta promove responsabilidad, coordinacion y colaboracion entre e partinan interesa, e proyecto lo busca pa establece un encargo cu ta fomenta invasion, eficiencia y miho practicanan den cuido di salud mental”, Minister Ottley di VSA a bisa. Gobierno di Sint Maarten, y specialmente Ministerio di VSA, ta dedica na traha den colaboracion cu e partinan interesa, incluyendo agencia di gobierno, dunado di cuido medico y grupo di sosten, pa atende cu e fayo actual den e sistema y crea mehoracion duradero.
E proyecto ta basa riba e metanan strategico di e Ministerio di VSA y ta den linea cu e reformanan actual relaciona cu salud mental. E ministerio tin como meta pa mehora gobernacion, desaroya capacidad, ofrece cuido di calidad den comunidad, promove programanan preventivo, y mehora colaboracion entre stakeholdernan. E proyecto lo fortalece e sistema di cuido mental cu ta involucra diferente participante di sector di salud y social pa mehora servicio. E proyecto ta sostene tambe e desaroyo di un facilidad nobo pa Mental Health Foundation, e unico facilidad di salud mental di Sint Maarten, pa satisface necesidadnan futuro.
Mehoracion di servicionan di salubridad mental ta crucial pa e resiliensia di Sint Maarten y su reaccion riba desaster, y e Gobierno ta considera inversion den sosten psicosocialy salubridad mental como un prioridad principal. Esaki ta encera sigura cu servicionan di salubridad mental ta disponibel y accesibel pa personanan den necesidad, sin importa nan trasfondo of status socioeconomico. Pa medio di sosten pa un financiamento mas halto, mehoracion di infrastructura y desaroyo di e forsa laboral, e proyecto aki tin como meta pa fortalece e capacidad di e dunadonan di cuido mental pa brinda cuido y sosten di calidad.
Cu sosten di nos propio Nacional Recovery Program Bureau, Sint Maarten ta prepara pa lansa e proyecto di salubridad mental aki cu ta hopi necesario. E ta enfoca riba fortalecemento di nos sistema nacional di salud mental, actualisacion di e sistema di financiacion, y construccion di un facilidad nobo di cuido di salud mental. Adresando salud mental y problemanan psicosocial, nos ta alinea cu SDG 3, sigurando bida saludabel y promove bienestar pa tur. E proyecto di transformacion aki ta refleha nos compromiso pa no laga ningun hende atras riba e caminda pa progreso, fomentando un Sint Maarten mas saludabel y mas feliz pa generacionnan binidero. Mi ta spera cu dor di e colaboracion aki, nos por cuminsa construi un nacion mas resiliente y compasivo, un nacion cu ta preocupa pa bienestar di tur hende”, asina Prome Minister Silveria Jacobs a bisa.
E comite di direccion di e Fondo Fiduciario di Sint Maarten a aproba e proyecto na comienso di e aña aki, despues di lunanan di trabou preparatorio di parti di e ministerio y e stakeholdernan. E acuerdo legal a ser firma riba 4 di augustus 2023. Durante e proximo seis (6) luna, e ekipo di e proyecto lo elabora e actividadnan di e proyecto mas den detaye y lo consulta cu e actornan den e area di cuido di salud pa racionaliza ainda mas con e proyecto lo wordo implementa den e proximo añanan.
Sint Maarten Trust Fund ta ser finansiá pa e Gobierno Hulandes, maneha pa Banco Mundial y implementa pa NRPB na nomber di Gobierno di Sint Maarten.
