Djasabra ultimo 19 di febrüari 2022 a selebrá e instalashon ofisial di Key Club Kibrahacha Liseo Boneriano na Eddy’s Restaurant.
Key Club Kibrahacha Liseo Boneriano a forma riba 18 di novėmber 2021 i ta konsistí di 21 hoben entre 12 i 19 aña ku ta sigi enseñansa na Liseo Boneriano. E Key Club ta un inisiativa di Kiwanis Club of Kralendijk, Bonaire ku pa medio di e asina yamá SLP, programa di servisio i liderazgo, ke kontribuí na formashon i desaroyo di hobennan di enseñansa sekundario.
E promé Key Club a forma na aña 1925 na California ku 11 miembro. E Key Club tabata un idea di miembronan di Kiwanis ku tambe tabata traha na skolnan sekundario. Nan a aserka Kiwanis ku nan idea pa forma un klup di servisio manera Kiwanis pa mucha. Un klup pa mucha ku a kuminsa ku un programa di orientashon vokashonal a bira despues un organisashon di servisio na komunidat kompleto. Awor Key Club ta e organisashon mas grandi i mas bieu na mundu pa muchanan di skol sekundario pa loke ta trata servisio na komunidat.
Durante e selebrashon spesial a instalá Presidente Jeada Kocks, Vise Presidente Corbin Pourier, Sekretaria Aryse Nicholson, Tesorero Christefer Marsera, Direktor di PR Chazz Lourens, Direktor di Servisio na Komunidat Guillaume Martiszoon, Direktor di Rekoudashon di Fondo Jaynah Francees, Director di Miembresia Ibrahim Valentijn, miembronan Angenie Nicolaas, D’Shantee Soliana, Fayah Silvano, Faliyah Sambo, Joshua Marsera, Jurgen van der Hoek, Maya Winklaar, Maynard Antoin, Kadianna Baptiste, Sharelty Rasiman, Tyzick Pourier i Viviana de Wind.
E advisornan di e hobennan ku ta miembronan di Kiwanis Emily Kocks, Alicia Xuan-Krijgsman, Marco van Zuilichem, Michealine Cathlin, Natalie Leito i Marisol Vrolijk tambe a haña un rekonosementu.
Na e seremonia a asistí tambe varios invitadonan spesial, sea en persona òf online, entre otro Lieutenant Governor di Division 26 di Kiwanis Natalie Daal, Presidente di Kiwanis Kralendijk, Bonaire Derchlien Vrolijk-Dijkhoff, District Luitenant Governor di Key Club Dana Forte, Division Lieutenant Governor Shomaika Jackson, Vise Presidente Santiago Celispaloschi di Key Club Colegio Arubano, Advisor Ebby Schwengle di Kiwanis Aruba, Diputado Nina den Heyer i Direktor di Liseo Barbara Sol.
Presidente di Kiwanis Kralendijk, Bonaire Derchlien Vrolijk-Dijkhoff a felisitá e hobennan ku nan instalashon ofisial i a desea nan hopi eksito i forsa. Tambe Sra. Vrolijk-Dijkhoff a entregá un plakat konmemorativo di parti di Kiwanis Kralendijk, Bonaire na Presidente Jeada Kocks.
Despues di e seremonia ofisial a sera e evento ku un sena festivo.