Hóben bo ke bira Agente di Wardakosta pa protehá bo pais?
Bo ke yuda salba bida di hende i yuda interseptá botonan ku ta trese merkansia ilegal Kòrsou? Wardakosta ta invitá tur hóben entre 18 i 25 aña, ku ambishon pa bira Agente di Wardakosta, pa inskribí pa e Estudio Básiko di Wardakosta (Basis Opleiding Kustwacht, BOK).
E Estudio Básiko aki ta un programa di estudio ku durashon di 1 aña konsistiendo di módulonan práktiko i teorétiko, inkluyendo un training pa bira Agente Polisial Ekstraordinario (Buitengewone Agent van de Politie, BAVPOL). Tantu hóbennan maskulino komo femenino por inskribí pa e estudio di BOK.
E kurso ta kuminsá ku un periodo di introdukshon, asina yamá ‘SamenSterk’, ‘Huntu nos ta Fuerte’. E meta di e periodo ‘SamenSterk’ ta pa duna kada aspirante e oportunidat pa krese fisikamente i tambe mentalmente. Durante di e periodo aki lo será konosi ku e organisashon di Wardakosta. Despues di ‘SamenSterk’ lo kontinua e kurso, kaminda aspirantenan lo siña habilidatnan básiko di entre otro, promé asistensha den aksidente (EHBO) i tiramentu.
Tambe edukashon nóutiko i módulonan di kapasitashon básiko di ekiponan di reskate, ekstinshon di kandela, legislashon di Wardakosta i manual di radio VHF, ku ta forma parti di e pakete di e estudio BOK. E kondishonnan pa inskribí ta ku bo mester tin e nashonalidat Hulandes, i ku bo ta inskribí na Aruba, Kòrsou, Sint Maarten òf islanan BES, ku bo tin entre 18 i 25 aña di edat na inisio di e kurso. Bo mester tin minimal un di e siguiente diplomanan: MAVO- 4/ VMBO/VSBO-TKL/ L.T.S/ T-stroom/ EPB-door -stroom/ EPI òf un diploma ekivalente na edukashon sekundario, tin un diploma di landamentu, ku bo por lesa i skibi Hulandes, tin un bon kondishon físiko, no ta bisti brel òf lèns i ku bo no tin un ‘strafblad’.
Sí bo ta interesá den e estudio di BOK, bo por bishitá e wèpsait di Wardakosta via
werkenbij.kustwacht.org Einan bo por drenta e parti pa yega na e formulario di inskripshon. E estudio ta start den ougùstùs 2024. Inskripshon ta será 1 di maart.
