Resientemente Tourism Corporation Bonaire (TCB) a anunsiá
su kolaborashon nobo ku e koredónan lokal di wentsùrf Amada Vrieswijk, Elton ‘Taty’ Frans i
Youp Schmit. Un di e promé proyektonan ku a keda ehekutá den kuadro di e kolaborashon
duradero akí, ta inougurashon di e ‘Bonaire Bus’ den koperashon ku Amado Vrieswijk. Ta
konsiderá e ‘Bonaire Bus’ komo nos bòrchi di propaganda mobil. Amado i e tim di wentsùrf di
Boneiru lo biaha den Oropa ku e ‘Bonaire Bus’ pa asistí na tur nan kompetensianan di wentsùrf.
E ‘Bonaire Bus’ ta forma parti tambe di un kampaña digital ku dentro di poko Tourism
Corporation Bonaire ta bai lansa, kaminda miradónan òf opservadónan den henter Oropa por
partisipá i gana un biahe pa Boneiru.
Inougurashon di e ‘Bonaire Bus’ a tuma lugá dia 26 di yanüari na Zandvoort. TCB i Amado a
bishitá diferente partner turístiko importante di Boneiru na Hulanda pa kompartí kariño di nos
isla. Tur partner a risibí un kaha di te trahá lokalmente di Edson Frans i un pòstkart ku e artista
lokal Nadia Dabboussi a traha. Nos Embahadornan lokal di Boneiru a personalisá e pòstkartnan.
‘Nos ta hopi kontentu ku pa medio di TCB gobièrnu por duna un aporte na nos atletanan ku e
‘Bonaire Bus’. Ora nan ta di biahe, ya kaba nan ta duna hopi atenshon na nos isla i ku e bùs akí e
promoshon pa nos isla lo ta mas mihó visibel. Nos ta orguyoso i agradesido. Amado, Taty i tur
nos otro atletanan ta traha duru pa pone Boneiru riba mapa. Nos ta deseá nan hopi éksito ku e
kompetensianan binidero’, segun diputado Hennyson Thielman i diputado James Kroon.
