Riba djarason 16 di desèmber, Minister Jesus-Leito komo Minister di Tráfiko, Transporte i Planifikashon Urbano (VVRP) a hasi inougurashon di bòrchinan pa nòmber di kayanan den parti e áreanan di Weto i Herst. Simbólikamente, a desvelá e bòrchi di Kaya Paraiso nèt despues di Bon Preis.
Pa por yega na nòmbernan di kaya tin un komishon speshal ‘Straatnamen Commissie’ kual ta konsistí di funshonario nan di VVRP i di Enseñansa, Siensia, Kultura, i Deporte (OWCS). E komishon aki ta duna konseho na e ministernan konserní tokante e barionan ku mester haña nòmber, i nan nifikashon.
Servisio pa Obra Públiko (OW) ta atendé ku e ponementu di e bòrchi físikamente na un sitio adekuá, teniendo kuenta ku seguridat i visibilidat. Servisio pa Planifikashon Urbano (ROP) tin e tarea pa kordiná ponementu di nòmbernan di kaya pa e kasnan. Pues pa kada kas haña su nòmber i e number di kaya. Servisio di Kultura i Deporte ta enkargá ku eskoho di nòmbernan di kaya. Pa kada bario ta skohe un tema.
Ya pa un tempu kaba e nòmbernan ta konosí pa habitantenan di área di Weto di Herst i awor Gobièrnu a haña e medionan nesesario pa por ubika e diferente nòmbernan di kaya.
Diferente bario na Kòrsou a risibí nòmber di kaya atraves di añanan, i awor Weto ku Herst tambe lo tin kayanan ku nòmbernan di speserei i yerba a pone nòmber pa 13 kaya i nan ta: Kaya Afrikaantje, Kaya Paraiso, Kaya Banana di Ref, Kaya Barba di Palu, Kaya Amor Platóniko, Kaya Bela di Pasku, Kaya Flor di Libertat, Kaya Kolorita, Kaya Kadena di Amor, Kaya Yerba Santa, Kaya Kòkou, Kaya Yerba di Kamisa, Kaya Sopropo i Kaya Nim.
Un adrès, esta un nòmber di kaya i un number di kas ta di vital importansia pa entre otro servisionan di emergensia. Tambe e ta yuda pa e habitante por risibí tur su pòst na kas di un manera korekto. Tambe e ta un forma ku ta ordená e bario den su totalidat.
