Durante un conferencia di prensa na Centro pa Hoben y Famia, Minister di Asunto Social y Labor Sr. Glenbert Croes y e miembronan di e Comision Vision Pedagogico a duna inicio na e di 3 aña di siman di Lantamento di Mucha. E aña aki esaki lo tuma lugar cuminsando 16 di november te cu 25 di november 2020.
E idea pa e siman aki a cuminsa na momento cu e Taskforce di Reino di Derecho di mucha a keda instala na 2014. E Taskforce aki ta consisti di un representante di cada isla den Reino. Den e plan di trabou di e Taskforce aki a delinea algun temanan cu lo atende cu ne di un forma colectivo. Un di e temanan cu sigur e Taskforce kier promove, den bienestar di e muchanan, ta e tema di Lantamento di Mucha riba un forma positivo. Pa e motibo aki a sugeri na cada isla pa desaroya un vision pedagogico pa nan isla y tambe pa introduci un siman di conscientisacion tocante e tema di Lantamento di Mucha. Na 2016 Aruba a forma un comision Vision Pedagogico cu e meta pa formula un Vision Pedagogico pa Aruba. E comision aki ta consisti di 5 diferente organisacion: Directie Sociale Zaken, Fundacion Pa Nos Muchanan, Stg. Wit Gele Kruis Aruba, Fundacion Respeta Mi, Tienda di Educacion. E organisacionnan aki ta traha diariamente cu mayornan y tin como tarea pa sostene mayornan cu nan pregunta y problemanan riba tereno di Lantamento di mucha.
Desde 2018 a introduci na Aruba e Siman di Lantamento di Mucha. Gobierno a scohe e siman aki door cu e ta inclui e fecha 20 di november cu ta “Dia Internacional di Derecho di Mucha”. Aruba ta uni su mes na e causa aki y ta enfatisa riba e importancia di lanta nos muchanan den un ambiente di amor y siguridad. Durante e siman aki lo tin diferente actividad, tanto pa mayor como pa mucha. E calendario di actividad ta posibel danki na e diferente organisacionnan cu ta promove e vision pedagogico na Aruba y nan dedicacion na mehoracion di e bida di nos muchanan.
Banda di esaki Aruba ta conta tambe semper cu sosten di e medionan di comunicación y di e sector priva pa promove e derechonan di mucha y bunita ehempel di esaki ta e compañía nacional Bright Bakery cu den luna di November tin su kipashinan cu un diseño specialmente pa promove derecho di mucha y website www.derechodimucha.org.
Sociaal Crisis Plan ta mira e importancia den e trabou esencial cu e comision Vision Pedagogico ta haci y ta yuda cu fondo pa haci tur actividadnan posibel.
Ta importante pa nos muchanan y nan famia ta na altura di e derechonan di mucha y e 6 puntonan basico pa cada mayor por lanta nan yiu den un hogar cu amor, cariño y respet. E siguridad y bienestar di nos mucha- y hobennan ta responsibilidad di nos tur.
