Pa medio di e comunicado aki SMAC tin e sumo placer di informa comunidad di Aruba y e pueblo carnavalesco en particular cu Diaranson awor 11 di November 2020 pa 5’or y 11 minuut di atardi lo habri e temporada di Carvanal 67 cu hopi pikete.
Manera ya a comunica dia 27 di juli 2020 na e pueblo carnavalesco enberdad NO lo bay tin Carnaval na januari/februari 2021. Mirando e situacion actual di COVID-19 y cu Carnaval ta aglomeracion di hende y teniendo na cuenta e situacion financiero actual, no ta na su lugar pa organisa Carnaval na januari/februari 2021.
Sinembargo SMAC conhuntamente cu Gruponan Uni, Stichting Musica y Elite Studios a dicidi cu no por laga un fecha manera 11 di November pasa bay sin mas. 11/11 ta un dia special y ta e dia cu ta marca comienso di e temporada di Carnaval no solamente na Aruba pero na mundo henter. Ta uza e temporada aki pa tene reunionnan pa con ta bay organisa carnaval durante e aña siguiente, pero tambe ta cuminsa traha riba e disfrasnan.
E aña aki apesar cu no tin Carnaval na januari/februari 2021, toch nos di SMAC tin e speransa cu e situacion lo drecha y cu na juni/juli 2021 Aruba por celebra Carnaval 67.
SMAC conhuntamente cu Musica y Gruponan Uni ta invita tur ganadornan di un premio durante Carnaval 66 pa un Drive Thru, Diaranson awor 11 di November 2020 di 5’or y 11 minuut di atardi pa 7’or y 11 minuut di anochi den Caya Grandi na Playa, caminda na altura di Elite Studios lo entrega Awards nan.
Despues lo sigui un ceremonia virtual caminda lo presenta e Jingle di Carnaval cu un biaha mas, manera ta tradicion di hopi aña caba ta den man di e legendario DJ Ruben “Scorpio” Garcia y RBC cu ta sponsor e jingle aki. Tambe lo honra algun persona cu a contribui den gran forma na Carnaval y sera conoci cu e slogan pa Carnaval 2021.
Lo finalisa e anochi aki cu un virtual afterparty.
Ta invita pueblo di Aruba pa sigui e actividad aki riba e Facebook page di SMAC.
Di e manera aki pues Carnaval ta conoce un etapa nobo y un temporada nobo.
SMAC, Gruponan Uni y Stichting Musica ta invita pueblo di Aruba pa participa den e actividad aki na un forma virtual y di e forma aki duna inicio na Carnaval 67 cu lo ta diferente e aña aki.
