Durante e di kuater kuartal di 2022, produkto i servisio di konsumo na Boneiru a bira 8.1 porshento mas karu kompará ku e aña anterior. Durante e di tres kuartal, inflashon tabata 12.2 porshento. E bahada durante e di kuater kuartal ta pa gran parti debí na e subsidio riba e tarifa fiho di koriente ku a drenta na vigor dia 1 di novèmber 2022. CBS ta raportá esaki basá riba e índise di preis di konsumidó na Hulanda karibense.
Na Sint Eustatius, preis a subi ku 9.1 porshento riba base anual durante e di kuater kuartal di 2022. Durante e di tres kuartal, esaki tabata 9.0 porshento. E subida leve na Sint Eustatius ta prinsipalmente debí na subida di preis di kuminda.
Na Saba, inflashon a keda igual, tantu durante e di tres kuartal komo den e di kuater kuartal, preis di konsumidó a subi ku 9.7 porshento. Preis di kuminda i produkto pa mantenshon i reparashon di kas a bira mas karu kompará ku un aña anterior. E bahada di preis di kombustibel tabatin un efekto di bahada riba inflashon.
Preis na Boneiru a baha ku 1.9 porshento kompará ku e kuartal anterior
Kompará ku e di tres kuartal di 2022, preis na Boneiru a baha ku 1.9 porshento durante e di kuater kuartal. E bahada aki ta ser kousá prinsipalmente dor di subsidio riba e tarifa fiho di koriente for di dia 1 di novèmber 2022. Preis di kombustibel a baha ku 8.6 porshento kompará ku e kuartal promé.
Preis pa kuminda a subi ku 2.2 porshento kompará ku un kuartal anterior.
Preis a subi na Sint Eustatius i Saba ku 0.9 porshento kompará ku kuartal promé
Preis di konsumidó na Sint Eustatius a subi ku 0.9 porshento durante e di kuater kuartal di 2022, kompará ku e di tres kuartal. Kuminda i bebida sin alkohòl a bira mas karu kompará ku di tres kuartal, preis di fruta fresku a subi ku 11.3 porshento.
Konsumidónan na Saba tambe a paga 0.9 porshento mas durante e di kuater kuartal di 2022, kompará ku un kuartal anterior. Preis pa kuminda i bebida sin alkòhòl a subi ku 3.5 porshento den e kuartal aki. Tambe preis di produkto pa mantenshon di kas a subi ku 23.5 porshento kompará ku e kuartal promé. Preis di kombustibel a baha ku 6.9 porshento kompará ku di tres kuartal. Ademas, transporte di persona via avion ta mustra un bahada den preis di 19.6 porshento.
Webu a bira mas karu na Sint Eustatius i Saba
For di e di dos kuartal di 2022, preis di webu ta subi konsiderablemente. Durante e di kuater kuartal di 2022 preis di webu na Sint Eustatius tabata 32 porshento mas karu i na Saba 7 porshento mas karu kompará ku un aña promé. Na Boneiru preis di webu a keda igual.
Promedio di desaroyo di preis den 2022
Den 2022, promedio di preis na Boneiru tabata 9.7 porshento mas haltu kompará ku 2021. Na Sint Eustatius preis tabata 7.7 porshento mas haltu kompará ku 2021 i na Saba 8.6 porshento mas haltu. Riba tur tres isla esaki ta relashoná ku preis mas haltu pa kuminda, transporte i kas, awa i koriente.
Sifranan preliminar
E sifranan di e di kuater kuartal di 2022 ta preliminar i lo stipulá nan definitivamente na momento di publikashon di e di promé kuartal di 2023.
