Diasabra ultimo den un centro di bario yena cu hende 5 agrupacion musical a competi pa saca un ganador pa e festival organisa pa fundacion Bernadina Growell-Kock. E festival aki a ser dedica na un gran valuarte di tambu, sr. Vicente Ras di 93 anja di edad, kende despues di a ricibi su homenahe a dedica 2 cancion na su pueblo.
E Maximo ganador di e festival a resulta sra. Indra Stamper cu e agrupacion musical “Tradicion Musical” cu e cancion titula Lamento Rubiano di e compositor sr. Vicente Ras. Indra a conecta cu publico y a haya su apoyo. Na secundo lugar a resulta sr. Angelo Koolman cu e agrupacion Tipico Pegasaya cu cancion titula “Loco Loco” di e compositor Bernadina Growell-Kock dfm. Angelo tambe a pone e publico gosa y na tercer lugar a resulta sra. Lucia Thiel cu agrupacion musical “Sodo y Cuero” cu e cancion titula “Le-le-la” di compositor Bernadina Growell-Kock dfm. Lucia su voz ta sona manera di Bernadina y pueblo a biba cu su cancion.
Fundacion Bernadina Growell-Kock ta agradecido cu e apoyo cu e festival y tur e otro festivalnan ta ricibi den pueblo. Danki na e agrupacionnan musical y cantantenan pa nan participacion asina bunita y anima. Ta agradico alabes na e sosten cu a ricibi di Departamento di Cultura, Setar y Banco di Caribe. Tambe na e publico cu ta tuma tempo pa bin na e festival. Fundacion kier gradici yiunan di Vicente, especial Orion’s, nietonan, especial Jeremy y Marcia Stamper pa nan sosten cu informacion y transporte pa cu Vicente por a ricibi su homenahe.
Alabes fundacion ta extende palabranan di gratitud na nos prensa cu a sabi di sosten e evento aki tanto pa medio di cobertura di e conferencia di prensa como pa medio di presencia durante e evento.
