Un hende di tur hende asina Joan Coronel tabata conoci na Aruba, semper dispuesto pa scucha cualkier reto y problema di otro hende: cla pa duna un man unda cu e por y si e no tabata por, e ta busca un otro manera pa toch asisti un hende. Esey su curason social tabata inspir’e pa haci henter su bida. Joan tabata den hopi organisacion pero semper den “background”: e nunca tabata busca publicidad pa su mes.
Dia Joan Coronel a yega Aruba despues di su estudio na Hulanda na fin di añanan 50, e tabata un di e prome trahadornan social Arubiano despues di Muñeca Yarzagaray, Clyve Lacle y Anneke Brüning.
El a cuminsa na Dienst Maatschappelijke Zorg pa despues bay traha na Stichting Reclassering y Kinderbescherming na unda e tabata specificamente encarga cu Kinderbescherming te dia el a bay cu pensioen na aña 1997.
For di tempo cu e tabata traha na Reclassering y Kinderbescherming ya caba e tabata activo riba un tereno social hopi amplio. Un di e prome fundacionnan den cual el a hunga un papel importante tabata Fundacion Mental Health.
E tabata forma parti di Cede Antiyas caminda e tabata secretario. Dia nos isla a haya su Status Aparte na 1986,el a keda forma parti di directiva di Cede Aruba .
Joan tabata envolvi tambe den Stichting Antiliaanse Jongens/Meisjes Gilde AJMG, cu depues a bay over den Scouting Aruba.
Otro Fundacion den cual Joan a funciona tabata Fundacion Famia Planea. Na 1981 FEPO Fundacion pa esnan cu problema di oido a wordo lanta, den cual Joan tambe tabata hopi activo.
Di Fundacion pa Hende Muher den dificultad e no tabata miembro di bestuur pero semper nan por a conta riba su apoyo.
Joan a forma parti di e prome board di Quota Club Aruba cu el a yuda lanta na 1987. Quota e tempo ey tabata consisti di hende muher profesional cu kier a y ainda ta dedica nan tempo y esfuerso na trabaonan voluntario pa nos comunidad.
Tambe Joan tabata miembro di SAC y eynan e tabata encarga specialmente cu Carnaval di mucha.
Na 1998 el a yuda lanta SOS Teleayudo, un telefon cu hende por yama ora nan tin necesidad pa ser scucha p.e. ora di soledad, pero tambe ora tin otro problema. E tabata coordinador di e organisacion aki y el a train e voluntarionan con pa atende e yamadanan y purba busca solucion hunto cu esun cu yama. SOS Teleayudo tabata e orea pa hopi hende
Riba tereno cultural tambe Joan a marca historia: Na aña 1984 Joan a bira miembro di directiva di Stichting Schouwburg Aruba y mesora el a bira secretario, pa despues na aña 1990 bira presidente di Cas di Cultura. El a sali for di directiva di Cas di Cultura na aña 2003. Dia 11 di maart 2003 a organisa un anochi di despedida pa Joan y gradicie pa su trabao inmenso cu el a haci pa nos Cas di Cultura.
Bao su presidencia Cas di Cultura a inicia un serie di renobacionnan grandi y visibel na e unico teatro di Aruba. Hunto cu demas miembronan el a percura pa na 1986 traha un entrada apart pa Muziekschool y den e mesun aña a cumpra lichtorgels nobo pa presentacionnan.
Na 1989 a duna Cas di Cultura un entrada hopi mas moderno y a cumpra projectornan nobo di cine.
Na aña 1995 a renoba dak y verf henter e edificio pa un aña despues cumpra stoelnan nobo pa auditorium. Na 1996 a instala e stoelnan cu tey ainda.
Na 1998 a haci un trabao grandi renobando lobby, café, sala di exposicion y tambe a crea un patio, cual proyecto mescos cu hopi otro a wordo financia dor di UNOCA.
Na aña 2000 cu yudanza financiero a percura pa cumpra ekipo moderno pa zonido y luz. Un aña despues a renoba auditorio tecnicamente pa na 2002 instala e asina yama “zaalbruggen” cu ainda ta visibel den auditorium. Via di e zaalbruggen aki por a maneha e luznan hopi mas profesional.
Na maart 2003 a tuma lugainauguracion di e ekiponan aki na Cas di Cultura. Ya pa dos aña trabaonan di modernisacion tabata andando y e resultado tabata un di e facilidadnan mas moderno den Caribe. Cu ayudo di primeramente Unoca, Prins Bernhard Fonds, Gobierno di Aruba y VNOA, a drecha e edificio y haci e interior uno hopi mas calido y moderno. Tabatin presentacion di baile, musica y teatro pero e culminacion tabata un homenahe na presidente saliente Sra. Joan Coronel.
Presidente nobo Sr. Sim Frank (den feliz memoria) a elogia Sra. Coronel pa e trabaonan grandi cu el a haci for di dia el a drenta directiva na 1984, prome como secretario y despues na 1990 como presidente. Sr. Frank a menciona cu Joan a conoce temponan scur caminda destino di Cas di Cultura tabata hopi insigur. Pero hunto cu otro miembronan di directivael tabata sa di supera hopi obstaculo y awee ta bay laga atras un teatro di Aruba bon ekipa, un fundashi esencial pa sigui desaroya riba dje.El a laga un bashi grandi pasobra bao su liderazgo masha hopi proyecto a wordo realisa, sinembargo su maneho dinamico a sirbi como simia pa Cas di Cultura despues bira un teatro cu tambe ta inicia programacion di tarima. E la visualisa un centro cultural mas profesionalisa unda e funccion di un director diario lo wordo introduci y empleadonan por sigui desaroya. Como simbolo di aprecio Sra. Coronel a ricibi un cuadra di e fachada di Cas di Cultura, pinta pa artista Irene Peterson. El a recorda cu e tabata un di e miembronan cu a acerca artista Evelino Fingal pa diseña e mural riba Cas di Cultura cu e simbolonan Indjan. Tambe tabata presente na e despedida aki Minister di Cultura Sr. Ramon Lee.
Na aña 1996 Joan Coronel-Peterson a wordo condecora Lid in de Orde van Oranje-Nassau.
Joan tabata un hende cu a haci hopi pa hopi organisacion na Aruba, sinembargo sempertras di cortina. Aruba por ta hopi agradecido na Sra. Joan Coronel pa a carga e unico teatro cu awendia ta funcciona den parti Caribense di Reino.
