In Memoriam – Eddy Tromp

Eduardo Tromp, conoci na Biblioteca Nacional Aruba como Eddy of EddyTec a nace dia 6 di augustus di aña 1942.

Na aña 1960 Eddy ta cuminsa traha na Radio Kelkboom, e tempo ey situa na Emmastraat. Na aña 1972 Eddy ta drenta servicio di Gobierno na Departamento di Cultura y Educacion. Na aña 1986 Aruba ta haya su Status Aparte y Eddy ta bin traha na Biblioteca Nacional Aruba.

Coleganan di Biblioteca Nacional Aruba ta recorda Eddy como un persona respetuoso, semper den bon humor y cu hopi conocemento musical. Eddy tin un pasion pa musica, principalmente musica cu ta forma parti di nos herencia cultural. Eddy semper tabata para cla pa yuda comunidad. Na aña 2002 Eddy a baha cu pensioen.

Eddy su aporte na nos herencia cultural tabata hopi grandi:

-Co-creador di e programa “Butishi di Alegria”, transmiti na Radio Kelkboon pa 40 aña largo. Grabacionnan tabata tuma luga na Biblioteca Nacional Aruba;

-Pionero den pone zonido entre otro pa festivalnan di Voz-i-landia, OTI, Dande, Calypso y Road March, Tumberito y sin lubida Bon Bini Festival;

-Pionero di DJ & Sound den su “Van” esaki tabata conoci como EddyTec;

-Creador di concepto y grabacion pa “Concierto di Siglo” un programa di Biblioteca Nacional Aruba;

-Contribucion, specialmente na fundacionnan “non-profit”, parokianan, caminda di cruz organisa pa Atan Lee sr. d.f.m., centronan di bario y tambe gruponan carnavalesco di mucha.

Eddy su contribucion na musica folclorico y cultura tabata remarcabel. El a ricibi condecoracion Real tambe pa su aporte na esaki. Eddy a traha hunto y a colabora cu hopi di e baluartenan di Aruba, entre otro Maybelline Arends-Croes, Diana Antonette, Jubi Naar, Ito Tromp, Emile Kelkboom, Martha Figueroa, Betico Croes d.f.m., Atan Lee d.f.m, Valentino “Vale” Croes d.f.m. 

Eddy a forma un pilar importante den comunidad di Aruba, y a haci un diferencia specialmente riba tereno musical y cultural. El a documenta musica y a percura pa asina nos herencia cultural ta salvaguardia. Eddy e persona clave pa sea graba musica of pa pone zonido.

Eddy un pilar di nos cultura ta laga un legado atras. Hopi condolencia y forsa na su casa, yiunan, nietonan y henter famia. Eddy masha masha danki pa tur bo aporte musical y cu Eddy drumi dushi den brasa di Señor.