Durante e reunion di Konseho Insular pa trata e diseño di ordenansa ‘Impuesto riba awa shushi Boneiru 2021’ konsehal Daisy Coffie a bisa ku e rapòrt Nibud ku gobièrnu di Boneiru a laga traha na aña 2014 a yega na e konklushon ku un gran parti di nos poblashon ta biba den pobresa. Pa verifiká si e sifranan di Nibud tabata korekto, Hulanda a laga Regioplan hasi e mesun investigashon na aña 2018. E rapòrt di Regioplan ‘Onderzoek naar een ijkpunt voor het sociaal minimum in Caribisch Nederland’ ta yega na e mesun konklushon ku Nibud: tin pobresa serio na Boneiru. Ministerio di Asuntunan Sosial a disidí di analisá e rapòrt aki i a stipulá temporalmente un mínimo sosial di Usd. 951 pa luna. Ora esaki a bira posibel, por a oumentá e suèldu mínimo te na e montante aki. Sekretario di estado Knops ta di opinion ku no ta ku solamente oumento di salario, bo ta kombatí pobresa. Mester wak e banda di e gastu tambe na Boneiru pa un hende por biba desentemente. E ora ei a skohe pa un aserkamentu di dos banda, esta na un banda oumento rasonabel di entrada, pero na e otro un banda purba na strukturalmente BAHA gastu.
Kontradikshon: no baha pero subi gastu!
Segun Daisy Coffie ta hopi importante ku tantu Hulanda komo Boneiru ta keda konsistente den nan maneho pa baha gastu. Pa Hulanda esaki ta nifiká ku e ministerionan mester traha huntu i no lòs for di otro. No por ta asina ku Ministerio di Asuntunan Sosial ta lucha pa baha gastu òf supsidiá gastu pa nos hendenan, anto otro ministerionan ta bin ku lei i/òf reglanan ku ta oumentá gastu pa nos hendenan. Mester buska e balansa ei. Daisy Coffie: ‘Pero kiko ta pasando awor? Nos ta diskutiendo un ordenansa ku netamente su intenshon ta pa SUBI gastu den tur kas di famia i tambe SUBI gastu di hasi negoshi riba nos isla. Tantu e karta di WEB komo e aklarashon di e ordenansa ta enfatisá e supuesto importansia pa stipulá e ordenansa aki promé ku e aña aki kaba: Ministerio di Infrastruktura i Maneho di Awa a akordá pa duna supsidio bou di kondishon ku Boneiru ta aseptá i stipulá e ordenansa aki den aña 2020.’
Preshon riba Konseho Insular
Tambe konsehal Daisy Coffie a trese dilanti ku konsekuensianan si NO aseptá ni stipulá e ordenansa aki ta ku Ministerio di Infrastruktura i Maneho di Awa lo NO duna supsidio di 8.5 mion euro te ku aña 2024 i tampoko 2 mion Euro pa aña 2025 i 2026. WEB lo tin un pèrdida den e aña 2020 aki di 2 mion euro pa purifikashon di awa pretu i dor di esaki finansiadónan lo eksigí nan fiansa bèk i lo no por kaba traha e planta di awa di bebe, ku konsekuensia ku kosto di awa di bebe lo SUBI den korto tempu. Ministerio di Asuntunan Ekonómiko lo baha òf para e supsidio ku nan ta duna pa elektrisidat, pasobra nan no ke pa supsidiá instalashon pa atendé ku awa pretu via tarifa di elektrisidat. Ku otro palabra: ku menasa i intimidashon ta pone preshon riba Konseho Insular! Konseho Insular mester aseptá i stipulá e ordenansa aki pasobra sino tin konsekuensianan enorme pa pueblo di Boneiru! Sr. Knops ta realisá si, ku na final di dia atrobe ta e pueblo lo mester paga?
Kiko ta e benefisio pa pueblo?
Finalmente Daisy Coffie a lansa un seri di pregunta kaminda el a trese entre otro lo siguiente dilanti: ‘Mi ta deseá un bon splikashon pa mi, pero mas tantu pa pueblo por komprondé ki benefisio e tin pa partisipá den e impuesto aki ku ta na kaminda. No a duna Konseho Insular niun bista ainda di e tarifanan. Ami no por bai di akuerdo ku e ordenansa aki miéntras no tin un indikashon kla di kon haltu e tarifa – tantu esun fiho komo esun variabel – ta bai ta di 2022 te ku 2027. Gobièrnu por splika raad, kuantu e impuesto aki ta bai ta? Por duna un garantia, ku un sierto kantidat di e awa purifiká aki ta na disposishon di nos kunukeronan ku ke bai praktiká agrikultura òf kria bestia? I kuantu e tarifa pa e kunukeronan aki lo bai ta pa küp? Òf tur e awa purifiká ei ta bai pa e hotèl- i risòrtnan ku ta konektá riba e sistema di kloaka? Dado kaso ku e awa aki ta na disposishon di nos kunukeronan tambe: ta ken ta sòru pa transporte di e awa aki pa kunukeronan?’
