Tourism Corporation Bonaire ta informá
Dia 28 di sèptèmber 2021 Tourism Corporation Bonaire (TCB) a hasi un petishon públiko pa proposishon (request for proposal – RFP) na empresanan riba tereno di inovashon i teknologia digital i di informashon pa desaroyá un plataforma online pa kobramentu di e impuesto di turista nobo ku nan a proponé (pa no-residentenan).
Entidat Públiko Boneiru a apuntá TCB komo e entidat ku ta responsabel pa krea e plataforma online ku komo meta pa sinkronisá e esfuersonan di komunikashon pafó di nos isla den un solo portal di destinashon.
TCB ta kontentu di por partisipá ku diferente empresa riba tereno di inovashon i teknologia digital i di informashon for di nos region, for di Oropa i for di Merka a mustra interes i a mèldu nan mes pa forma parti di e RFP ku a keda publiká, dentro di e ‘deadline’ di 8 di òktober 2021. TCB a instalá un komishon interno di vários representante profeshonal pa selektá e mihó partner pa e trabou a base di un lista fiho di kriterio, manera a keda publiká den e RFP. E komishon di TCB a evaluá tur e proposishonnan a base di e siguiente kriterionan: konosementu di embergadura di e trabou i e metanan, plan di aserkamentu, strategia i metodologia i tambe eksperensia anterior, kalidat di e personal profeshonal asigná na e proyekto i e presupuesto.
Komo konsekuensia di e echo ku Entidat Públiko Boneiru a posponé aprobashon di e legislashon relashoná ku e impuesto di turista (13 di aprel 2022), mester a posponé e desishon di TCB tambe pa selektá un partner pa desaroyo di e plataforma online akí pa kobramentu di e impuesto di turista manera intenshoná den e RFP, te fin di luna di aprel 2022. TCB a studia tur e proposishonnan ku nan a risibí for di òktober 2021 un biaha mas i resientemente (aprel 2022) a selektá IBIS Management Associates Inc (IBIS), establesé na Kòrsou, pa na nòmber di TCB i su stakeholdernan desaroyá e proyekto pa implementashon di e plataforma nobo di impuesto di turista i duna guia na esaki.
TCB ta partisipá ku e éksito di IBIS Management Associates ta basá riba un konosementu amplio di prosesamentu di pago direkto. IBIS su punto fuerte tambe ta e nesesidat di reportahe di institutonan finansiero i empresanan i suministro di solushonnan ku fásilmente por keda integrá den e sistemanan núkleo i prosesonan empresarial eksistente. IBIS ta duna servisio na mas ku 40 instituto finansiero i empresa den área karibense i Amérika Sentral i Suramérika i nan a akumulá un sírkulo di kliente bankario fiel riba henter mundu. Uso di IBIS pa e proyekto importante akí pa Boneiru ta prinsipalmente basá riba e eksigensianan i komplehidat di e plataforma nobo di impuesto di turista i tambe riba e anterior eksperensianan ku IBIS Management tin ku suministro di portalnan gubernamental i di biahe. IBIS ta spesialisá tambe den efisiensia ku ta duna ganashi, prosesamentu di pago direkto, uso di banko digital i siguridat online.
Durante e próksimo tres lunanan, kuminsando na luna di yüni 2022, TCB ta bai organisá diferente seshon ku interesadonan pa tene nan na altura di progreso i implementashon di e plataforma nobo di impuesto di turista. Meimei di luna di yüni e plataforma nobo lo ta disponibel i lo kompartí esaki ku tur interesado. Pa pregunta tokante implementashon di e impuesto di turista nobo i simplifiká bo por tuma kontakto ku marketing@tourismbonaire.com
