HVT Games organisa pa team di calamidad HOH exitoso

Tremendo weganan deportivo cu enfoke riba teambuilding

Horacio Oduber Hospital tin ya pa hopi aña un “Bedrijfs Hulpverleners team” conoci como HVT (HulpVerleners Team).  HVT ta consisti di 120 miembro completamente capacita pa yuda y brinda asistencia durante cualkier calamidad. Cu enfoke riba “teambuilding” anualmente ta organisa diferente actividad unda HVT’ers ta topa y recientemente a organisa e asina popular HVT Games na Nikky Beach.
HVT Games ta manera e tan conoci ‘spel zonder grenzen’pero riba lama y tambe riba tera. Tabatin diferente wega riba santo, den awa, den boto unda e teamnan ta bay tur cu tin contra otro pa mira ken ta sali victorioso.  Ehempel ta kayak, tira skippy bal, canoa race, yena hemchi cu awa, cana riba ski etc. E HVT games aki ta pa miembro pero tambe pa coleganan di HOH cu kier participa y disfruta tur hunto di un atardi yena cu ambiente y movecion. Un manera diferente pafo di trabou riba un diabierna atardi bandi nos dushi lama pa bini hunto unda apoyo di colega no tabata falta.

E weganan un bes mas yena di aventura y hopi movecion unda cu e ganado absoluto a resulta den e team yama Crazy Mix, sigui pa team di ICU 1 cu a sali number 2 y EmergenSea a bay cu e di 3 luga. Tremendo ta pa mira e teamnan bin cu solucionnan creativo y maneranan di traha hunto pa logra nan proposito cu ta pa gana wega sea mas lihe of na un manera mas genial.

Team organisado di e tremendo siman di HVT ta gradici tur persona cu a yuda haci e actividad aki posibel esta e dream team di ayudante. Tambe ta gradici Hunta di Directiva di Hospital pa a yuda cu e premionan pa e ganadornan. Sigur un atardi unda cu e teambuilding a resalta y cu coleganan por a pasa un dushi tempo hunto den bon vibe.