ORANJESTAD, Aruba
Parlamentario di AVP, Robert Candelaria, a bisa despues di e reunion den Parlamento, cu Gobierno a suministra informacion y splicacion riba e condicionnan cu Hulanda a impone pa e fiansa.
E Parlamentario a splica cu ta comprendibel cu comunidad, den un situacion bastante vulnerabel na e momentonan aki, cu no tin trabou, cu tin’e hopi malo, sin entrada, tabata di pensamento cu si Hulanda ta dispuesto pa pone placa, pa nos ban tum’e. E bisa “SI” sin tabata na altura di e condicionnan mara na e prestamo aki. Na momento cu documento y condicionnan a bira conoci den comunidad, pero mas importante su consecuencianan, pa tur e añanan mara na esaki lo bira, e ora e pueblo a hala atras y bisa cu no ta locual cu nan ta desea.
Robert Candelaria ta haya cu ta importante pa compronde cu e status aparte cu Aruba tin na e momentonan aki ta decadanan a tuma pa logra y yega caminda cu nos ta. Ta generacionnan a papia, delibera, pensa, debati tanto den Antias como na Hulanda pa asina por a yega na nos Status Aparte. Locual ta mira cu awe, den transcurso di algun dia mester entrega esaki por completo. Locual ta remarcabel ta cu e motibo ta pa haya un poco placa pa por sobrevivi, pero cu consecuencianan inaceptabel, den cierto sentido te hasta contra ley y sin laga afo cu ta cerando un convenio bou presion y ta sinti un forsamento, cu esaki no ta corecto.
Robert Candelaria ta duna tambe e banda hudicial como un persona cu añas di experiencia for di e mundo di husticia. A traha cu coleganan di Hulanda den RST den cooperacion cu departamento policial di Aruba den bon harmonia caminda a logra hopi hunto. No ta mira e motibo pakico mester a bin cu condicionnan cu ta mishi cu husticia, enseñansa y sector di salubridad. Locual cu Candelaria ta cuestiona ta condicionnan irrelevante pa haya placa fia. Si mira cu e discucion ta uno financiero cu Reino pero e condicionnan no ta relevante na esaki. Ta mishi cu Husticia, Enseñansa y demas, cu ta incomprendibel.
Ta mira cu locual ta importante awo akinan y locual cu tin cu haci ta bay bek hunto cu Reino y papia riba e cooperacion mientras e parti financiero tin cu para riba su mes. Na Aruba a bisa cu ta OK pa bin mas supervision, mester traha riba eficiencia pero no por bruha dos cos den otro. Pero un cos ta sigur, nos ta contra! Semper nos tabata tin bon comprondemento den Reino y kier mantene esaki pa traha hunto y no lo entrega autonomia djis pa un yudansa financiero den momento di crisis.
