For di momento cu gobernado a huramenta Benny Sevinger como miembro di Parlamento e posibilidad pa Robert Candelaria bira parlamentario, a desvanece por completo y e lo tin cu regresa dentro di algun luna bek pa cuerpo policial.
Robert Candelaria a bin ta sperando pa mira kico lo pasa cu Sevinger cu na di 29 luga riba lista di AVP, a logra si saca su mes cu voto personal pero kende tabata deteni cu acusacionnan serio den su contra.
Pa motibo cu ainda Ministerio Publico ainda no acusa oficialmenbte Benny Sevinger pa asina e por bin dilanti di mesa berde, a permiti e politico di AVP huramenta siman pasa como miembro di parlamento pa loke ta bay bira algo temporal te ora cu su caso bin dilanti di hues.
Mientras tanto Robert Candelaria candidato number shete riba e lista di AVP, el a wordo perhudica ora cu Sevinger a logra di saca su mes cu voto preferencial, awor tin un periodo ainda cu e ta wordo cubri pa ‘overbruggingstoelage’ cual sinembargo tin un duracion di un aña.
Esaki ta duna Candelaria y partido AVP espacio pa warda un periodo prome cu tin claridad riba e situacion di Benny pa e ora mira si e lo tin cu retira como miembro di parlamento y asina habri caminda pa Candelaria drenta parlamento tog.
Candelaria ta un di e poco candidatonan cu a logra bay dilanti den su voto personal den eleccion di 25 di juni ultimo pero awor ta para un banda y tin cu spera kico lo pasa si Benny wordo acusa di un of otro crimen y e wordo haya culpabel loke lo pone cu e lo tin cu retira.
Ta spera cu Benny lo haya su mes den mesun situacion cu Paul Croes a haya su mes den cuater aña pasa ora cu Corte a condena Paul caminda e no por eherce ningun posicion publico pa un periodo di varios aña.
Si esaki resulta cu Benny Sevinger tambe, e lo tin como consecuencia cu Benny lo tin cu retira como miembro di Parlamento y e ora e posibilidad lo habri pa Robert Candelaria eventualmente drenta parlamento tog.
Esaki por ta posibel ainda si e caso contra Benny bin dilanti prome cu fin di aña aki ainda of esaki lo por bira comienso di 2022 caminda ainda Candelaria ta riba overbruggingstoelage y facilmente e lo por drenta ki ora cu ta como miembro di Parlamento, un funcion cu el a ocupa ultimo cuater añanan pa AVP.
No ta Candelaria solamente ta biba cu e frustracion politico den partido AVP ya cu e disgusto y decepcion den partido berde ta sigui crece despues cu hopi ta cuestiona e forma con lider di AVP a formula su lista y e resultado cu a wordo logra den eleccion.
Hasta tin rumor cu algun candidato sumamente disgusta lo kier bandona e partido y lanta otro partido cu lo tin mesun vision politico cu AVP pero si lo conoce e mesun tradicion di antes di AVP cu pa dos eleccion sigui, ta sufri derota inespera.