E temporada di orkan ku ta dura te ku 30 di novèmber a kuminsá i manera ku nos a mira na momentu di e molèster ekstremo di áwaseru na luna di novèmber di aña 2022, nos outosufisiensia i solidaridat ta grandi na Boneiru. Komo gezaghèber mi ke hasi un yamada na tur hende pa mustra e mesun solidaridat den preparashon pa un posibel tormenta, pa medio di yuda esunnan ku tin mester di yudansa. Yuda nan por ehèmpel limpia nan kurá, hasi nan kas resistente kontra orkan i kumpra e artíkulonan nesesario pa nan pakete di emergensia etc.
Entidat Públiko Boneiru ta duna e informashon i tepnan nesesario riba www.bonairecrisis.com pa prepará bo mes pa un tormenta tropikal òf un orkan. Riba e wèpsait akí tin kiko bo por hasi promé, durante i despues di un tormenta tropikal òf un orkan i kiko Entidat Públiko Boneiru ta hasi. Nan ta menshoná tambe e number di emergensia ku bo por yama i un lenk pa bai na e ‘Disasterprep Bonaire’ app via App Store i Google Play.
Download e ‘Disasterprep Bonaire’ i lesa kon bo por prepará bo mes pa diferente kalamidat. Den e app ei bo ta lesa tambe kiko Entidat Públiko Boneiru ta hasi, kiko e number di emergensia ta i kua ta nos kanalnan di medionan sosial. Via e app si ta nesesario Entidat Públiko Boneiru por manda mensahe importante pa tur usuario di e app.
Den e tempu binidero ta manda informashon èkstra via komunikadonan di prensa, nos páginanan di facebook (Gobièrnu di Boneiru i Openbaar Lichaam Bonaire) i vários medio di komunikashon. Den esakinan nos ta indiká kua ta e tepnan i medidanan pa preparashon pa un orkan.
E tim di kombatimentu di kalamidat ta para kla bo. Entidat Públiko Boneiru tin un tim di kombatimentu di kalamidat ku ta prepará su mes pa un krísis òf kalamidat. Si ta nesesario nan ta kombatí esakinan tambe. E tim di kombatimentu di kalamidat ta regla ku diferente organisashon kiko tin ku sosodé den kaso di peliger durante i despues di un orkan òf un tormenta tropikal. Nan ta hasi esaki por ehèmpel ku polis, kuerpo di bombero, dòkternan i kuido di poblashon. Durante un orkan Entidat Públiko Boneiru ta sòru tambe pa lugá di skonde pa hendenan ku no ta seif mas den nan propio kas.
