Den kuadro di e bishita ku un delegashon di Konseho Insular di Boneiru ta hasi na Hulanda, konsehal Junny Wout ta partisipando na un Kongreso tokante “Responsabilidat Komun, Igualdat i Konfiansa Mutuo” riba e dianan 6 i 7 di desèmber. E kongreso ta tuma lugá den e edifisio di Tweede Kamer na Den Haag i ta trata di e kooperashon entre e partinan oropeo i karibense di Reino Hulandes. Tin reto riba diferente tereno di kooperashon mutuo, no solamente koperashon polítiko i públiko, pero tambe riba terenonan privá. Nan ta enserá desafionan grandi manera maneho di klima, transishon di energia, derecho humano i prinsipalmente tambe kombatimentu di pobresa. Por atendé esakinan solamente ora ku tin bon koperashon a base di igualdat mutuo entre partidonan privá i públiko riba e islanan karibense i nan partnernan na Hulanda a base di konfiansa mutuo. Sin e kondishonnan básiko akí pa kooperashon, no ta yega na resultado konkreto den e koperashon di e partidonan akí.
E kongreso ta trata e nifikashon di e responsabilidat, kon ta duna forma na igualdat i konfiansa mutuo den práktika. Den otro palabra: kon ta realisá resultado pronto?
E kongreso ta bou di guia di senador di Eerste Kamer Mr. Jeroen Recourt i tin 25 orador i miembro di pènel ku ta duna kontenido via diferente tema na e kongreso.
Partisipantenan ta bini di entre otro e Konseho Insularnan BES, Kolegio Ehekutivonan di BES, parlamento di Aruba, Kòrsou i Sint Maarten i Hulanda, diferente representante di organisashonnan privá di tur e partinan di Reino Hulandes.