Un persona humilde ta permiti Dios goberna su curason.
Un persona orguyoso y arogante semper lo keda pretende cu e mes tin control di tur cos.
Humildad ta cambia conducta di hende.
Humildad ta cambia curason di hende.
Humildad ta haci hende amabel.
Humildad ta trece crecemento spiritual.
Humildad ta habri porta di bendicion.
Hende humilde tin Dios na prome lugar den nan bida.
Si Mi pueblo cu ta wordo yama na Mi nomber humiya nan mes y haci oracion y busca Mi cara y bira
for di nan mal camindanan e ora ey lo Mi tende for di cielo, y lo Mi pordona nan pica y cura nan tera.
Dios ta duna un bon splicacion cu hende mester ta humilde, pa hende drenta den presencia di Dios y
pa asina Dios por contesta oracion, Dios no ta acepta un oracion con cu ta. Dios ta acepta un oracion
cu humildad y reverencia, reconociendo cu e ta Dios y cu E ta Todopoderso.
Dios su standarte no a cambia, e a keda mesun cos, humildad ta keda prioridad pa Dios, pasobra un
curason humilde semper ta apreciable den presencia di Dios.
Awor mas cu nunca , nos mester reconoce cu Dios ta resisti orguyo, pero e ta duna gracia na e
humilde.
Mundo ta birando dia pa dia mas agresivo, orguyoso y arogante, hende kier haci locual cu nan kier,
biba manera nan kier y pensa cu Dios lo acepta locual nan kier.
Cain tambe a pensa asina cu e por a ofrece Dios cualkier sacrificio, y cu Dios lo a acepta, locual cu e a
ofrece pero Dios a rechasa e sacrificio.
Pesey den Romanonan capitulo 12: 2 ta para scirbi: No sea conforme e mundo aki,ma sea transforma
pa medio di e renobamento di boso mente, pa boso por comproba kico ta e bon y agradable y perfecto
boluntad di Dios.
Ta necesario pa tur hende busca e boluntad di Dios pa nan bida, no ta tempo di biba con cu ta mas,
pasobra dianan ta trabahoso y e binida di nos Señor ta serca.
Laga amor ta sin hipocresia, aborece locual ta malo, tene firme na loke ta bon,
Nunca paga malo cu malo na ningun hende, Respeta loke ta corecto den bista di tur hende.
Aspira pa tin pas cu tur hende, y sanficacion,sin cual ningun hende lo mira Señor.
Den tur esaki nos por ripara con importante humildad ta pa nos bida.
E recompensa di humildad,y e temor di Señor ta rikesa honor y bida.( Proverbionan 22:4).
Pasobra asina Esun halto y sublime , Kende ta biba pa semper,, Kende Su nomber ta Santo, ta bisa. Mi
ta biba den un lugar halto y santo, y tambe hunto cu esnan humilde y di spirito kibra, pa rebiba spirito
di hende kibra,y pa rebiba curason di e humilde.( Isaias 57:15).
Na e hende misericordioso,Bo ta mustra Bo mes misericordioso,na e hende puro Bo ta mustra Bo mes
puro, y na e hende perverso, Bo ta mustra Bo mes severo.( 2 Samuel 22:28).
Pasobra wowo di Señor ta move bay bin door di henter tera, pa e por sostene fuertemente esnan cu nan
curason ta completamente di dj’E.
Nos humildad ta duna nos bida calidad, nos humildad ta duna nos bida gracia, nos humildad ta siña
nos haci oracion, y con presenta nos mes dilanti di Dios. Pasobra nos Dios ta santo bibo y real, y su
husticia ta permanece pa semper.
Un cos nos ta sigur cu Dios ta resisti e orguyosonan y ta duna gracia na e humilde.
Sinceramente, Pastor Marcel Balootje.
