ORANJESTAD, Aruba
Nos ta conciente cu na e momentonan aki nos ta depende di Hulanda pa fiansa pa nos por mantene nos economia interno fuerte mientras nos lo recupera di e sla cu Covid tabatin riba nos unico pilar economico cu ta turismo. E fiansanan aki ta di vital importancia pa por cumpli cu salario di ambtenaren, fase y loonsubsidie p’asina nos por garantisa cu mamanan y tatanan por tin un trabou pero tambe entrada. Pero locual cu Hulanda kier purba pasa contra boluntad di un pueblo pa obtene un fiansa den temponan dificil ta algo sigur inmoral.
Impone Rijksconsensuswet Financieel Toezicht
Aruba desde 1986 tin su Status Aparte despues di un lucha di 1971 pa 1986 (15 aña) y sigur esaki a brinda e oportunidad di desaroyo pero lamentablemente nos mesun hendenan no a sa di balor’e y cuid’e.
Curaçao y Sint Maarten desde 2010 a haya nan Status Aparte depues di un lucha di 1986 pa 2010 (24 aña) via un consensusrijkswet unda a institui CFT pa hiba control financiero directo di Curaçao y Sint Maarten. Motibo pa esaki ta cu Hulanda a paga debe di ambos isla y unda nan por a drenta e Status Aparte aki sin debe. Pero nos por a mira cu CFT aki tabata un fracaso total compara cu CAFT cu Aruba conoce via ley. Ambos isla financieramente y economicamente a bay mas pio cu prome cu 2010 cu mas debe y sigur un economia stagna y hopi desempleo y pobresa den ambos pais. Sigur cu Covid por wak cu nan ta mas pio para cu Aruba cu nunca antes a fia placa di Hulanda y sigur nunca Hulanda a paga ningun debe pa Aruba manera a pasa cu Curaçao y Sint Maarten.
Pa mi persona como representante di pueblo ta haya cu Hulanda kier probecha di e momentonan dificil aki cu nos ta bibando door di Covid pa por impone nan boluntad y un cambio constitucional asina grandi no por ser defini den cuestion di algun dia. Esaki ta algo cu tin di consulta cu pueblo den su totalidad. Sigur e acto aki di Hulanda mester ser categorisa como algo inmoral y sigur cu falta di argumento den bista cu Aruba den comparacion cu e islanan directamente bou di CFT ta den pio estado y sigur e ultimo añanan Aruba a demostra den Reino como un ehempel di con por a bons bek di un situacion financiero desastroso cu no tabata producto di un crisis pero di mal maneho di sr Mike Eman y tambe cu a ser permiti door di Ministerraad di Reino.
Nos tur tabata sa di e exigencia di un entidad cu lo controla e placa cu nos lo fia y tin di paga bek pero cu kier bin di porta di cushina y forsa Aruba trece cambionan constitutional den 3 dia ta inmoral y inaceptabel!