Gezaghèber soliano a hasi un declaracion riba desishon di Hulanda
Mi kier enfatisá ku Entidat Públiko Boneiru i tur e órganonan di gobièrnu ta para
pa un komunidat sigur i un ambiente di biba salú pa tur siudadano. Nos ta hasiendo lo
máksimo pa garantisá esaki. Entidat Públiko Boneiru tambe ta konsiente di e urgensia i
nesesidat pa yega na solushon riba término kòrtiku pa e problemanan agudo. Manera sushi
biomédiko, asbèst, almasenamentu di zeta i tambe fuente di kandela bou di tera na lèntfel.
Nos ta konsiente tambe di urgensia pa yega na un solushon duradero pa e forma ku nos ta
prosesá sushi na Boneiru.
Bestuurscollege a kuminsá un trayekto urgente pa atendé ku e problemanan agudo ku a
presentá na lèntfel di Lagun for di luna di desèmber 2023 i na ougùstùs di e aña akí. Esaki a
resultá den un medida riguroso esta un ‘voornemen last onder bestuursdwang’ pa Selibon
dia 29 di ougùstùs 2024. Esaki ta nifiká ku a duna Selibon sierto tempu pa solushoná e
problema agudo. Selibon a tuma e situashon na serio.
Direktiva di e kompania a i ta hasi lo máksimo pa kumpli ku petishon di EPB pa solushoná e
problemanan agudo. Loke nan no a finalisá, segun palabrashon ku EPB, entidat públiko
Boneiru ta tuma ofer pa por finalisá nan mas pronto posibel. Bestuurscollege su esfuerso ta
keda dirigí riba solushon i kolaborashon pa solushoná e problemanan agudo i e proseso pa
yega na un plan integral tambe ta kanando. E kompania hulandes renombrá Royal
Haskoning ta koordiná esaki.
Djárason 13 di novèmber último, Representante di Reino suplente a ekspresá ofisialmente
den un karta su intenshon ku e ta bai aktua na lugá di Bestuurscollege i ta asumí
responsabilidat ku BC tin. Esta pa duna pèrmit i kontrolá kon ta prosesá sushi na lèntfel. Den
e periodo despues di e rapòrt di ILT, partidonan a hiba kòmbersashon riba un modelo di
eskalashon ku Representante di Reino suplente a fiha. Esaki ta konsistí di 6 fase di
eskalashon.
E intenshon ku Representante di Reino interino a ekspresá, ta basá riba entre otro e último
rapòrt di inspekshon di ILT. E inspekshon akí a tuma lugá di 27 pa 30 di ougùstùs último.
Entidat públiko Boneiru a entregá su punto di bista riba e intenshon ekspresá den e karta di
13 di novèmber 2024. Entidat públiko Boneiru tabatin ménos ku 24 ora disponibel pa
reakshoná riba esaki. Awe, 15 di novèmber 2024, representante di reino suplente a entregá
e desishon ku e ta tuma ofer e responsabilidat i outorisashon di Bestuurscollege pa
dunamentu di permit i supervishon i mantenshon di prosesamentu di sushi na lèntfel di
Lagun.
Bestuurscollege a tuma e desishon di hasi uso di e derechi pa entamá un proseso di
apelashon. Konsiderando e loke EPB a hasi, lo tabata na su lugá si representante di Reino
interino lo a komuniká i kooperá mas intensivo ku Bestuurscollege.
Komo gezaghèber mi ke enfatisá ku mester solushoná e problema urgentemente. I ku e
solushon riba término kòrtiku, mediano i término largu ta mihó sirbí ku kooperashon i
kolaborashon entre tur instansia envolví. Seguridat, salubridat públiko i protekshon di
naturalesa ta nos meta komun den esaki.
