E siman akí nos a haña e notisia menos agradabel ku Hulanda a disidí ku tur pais, ke men Boneiru tambe, ta haña kódigo oraño pa loke ta trata konseho di biahe. Hulanda a splika ku no ta Boneiru ta e problema sino situashon di COVID-19 na e pais mes. Ku kódigo oraño Hulanda ke deskurashá pasahero pa bini nos isla.
E notisia a sorpresa nos. Pasobra nos sa kon komersiante, empresario i trahadó den turismo ta pasando den momentonan difisil ku tiki turista biniendo Boneiru. P’esei mes Kolegio Ehekutivo a aserká Hulanda pa wak pa Boneiru haña ayudo èkstra pa sostené tur esnan ku ta bai tin ménos entrada pa motibu di e desishon pa bai kódigo oraño.
Te ku awe nos tin 4 kaso aktivo di COVID -19 registra aki na Boneiru. Nos sa ku mayoria di e hendenan ku a pega ku e vírus a infektá na trabou òf na kas. Pa evitá e chèns di kontagio na trabou nos ta konsehá tur empresa, ofisina i instansia pa laga trahadó traha mas tantu posibel na kas, en partikular despues di temporada di Pasku. Nos konseho ta pa sòru ku en todo kaso te ku 18 di yanüari 2020, trahadó traha na kas. Nos ta konsehá esaki komo ku nos ta tene kuenta ku durante vakashon di Pasku e kantidat di kaso di COVID-19 lo por oumentá.
Tin mas medida ku nos mester tuma pa evitá ku e kasonan ta subi. Nos sa ku delaster tempu abitante di nos isla i turista no ta kumpli tur ora manera mester ku e reglanan ku tin. Ta tene por ehèmpel fiesta òf evento ku baliamentu, ta tene fiesta ilegal i na enkuentro privá no ta mantené 1,5 mei di distansia. Mi ke pidi tur establesimentu di hóreka tur abitante i tur turista pa por fabor tene nan mes na e reglanan ku nos tin.
Huntu ku polis, Direktorado di Supervishon I Mantenshon, nos ta sigui kontrolá awor mas ku ántes pa tur hende kumpli ku e reglanan. Momento ku ripará ku tin tenementu di fiesta ilegal òf, fiesta ku DJ i muzik duru, nos ta aktua mesora. Esei ke men ku nos por ehèmpel por sera establesimentunan di hóreka ku no ta kumpli, òf duna organisadó di fiesta ilegal un but formal.
Mi sa ku nos tur gusta fiesta, balia, etsétera. Pero nos mester tene kuenta ku nos no por permití ku ta trese salú di nos mes i di otronan na peliger.
Si a abo no kumpli esei por peligrá salú di bo wela, mama, tata òf otro miembro di famia, bo amigu i konosínan. Laga nos mustra ku nos ta care pa otro. I kaminda por, laga nos yuda otro den esaki. Si bo mira ku un hende no ta tene su mes na distansia di 1,5 meter, hala e persona akí su atenshon.
Tin un otro motibu pakiko nos mester sigui kumpli ku e reglanan. I esei ta ku si nos haña un oumento di kaso di COVID-19, nos lo mester bini ku medida muchu mas severo ku mas lo afekta nos manera di biba i anda ku otro.
P’esei si bo tin keho, pa leve ku nan por ta, yama 0800 0800 pa traha un sita pa nan tèst bo. No duda ni tarda den esaki.
Selebrá e dianan di fiesta ku bo sernan kerí teniendo kuenta ku e reglanan ku ta konta. E Pasku akí lo ta otro pa nos tur. Selebrashon di Aña Nobo tambe. Laga nos tur kontribuí pa 2021 habri nos bon di salú. Pasa dushi dianan di fiesta.
