ORANJESTAD,Aruba
Segun PAHO y UNICEF e hoben y e adulto hoben ta e “promotor principal” di Covid-19 na Latino America y Caribe. Un tercera parti di hobennan y adulto hoben na Latino America y Caribe ta kere cu nan no ta na risico, segun encuestanan di UNICEF. Nos isla no ta e excepcion.
Pa e motibo aki, nos na Aruba, ta kere cu hubentud y e adulto hoben tin e yabi pa stop e contagio di e virus. Den e utimo simannan mas hende jong a bira positivo pa Covid-19 na nos isla. Segun analisis realisa e contagionan mas halto na Aruba ta den edad di 25 pa 34 aña cu ta e rango di edad miho informa y esun primordial den stimula nos economia. Asina mes cu e porcentahe di e grupo aki ta esun mas halto, e cantidad di esnan cuta bay hospital den e grupo aki ta hopi abou y no tin morto registra.
Loke ta resalta ta, cu e edadnan mas vulnerabel tin menos caso, pero tin un indice mas halto di persona hospitalisa y ta registra mas morto. Esaki ta duna di comprende cu hopi biaha e hoben y adultonan hoben ta esnan cu ta hiba e virus na esunan mas vulnerabel y tambe ta plama esaki door di sigui traha, socialisa of no haci exfuerso maximo pa cumpli cu protocol di proteccion of isolacion.
Ta pa e motivo aki cu Ministerio di Salud Publico y DVG Aruba ta adverti cu persona di tur edad por wordo afecta pa coronavirus pero esnan mas vulnerabel ta sufri e consecuencia. Ta urgi comunidad completo, specialmente hende jong, pa sigui tur precaucion di distanciamento social hunto cu labamento di man y bistimento di tapa boca. Hobennan y adulto hoben cu ta ignora e distanciamento social (e medida mas dificil pa nan) por contrae e virus y por plam’e, specialmente na esnan vulnerabel. Responsabilidad di e hoben y adulto hoben ta hopi importante den cuida nos poblacion vulnerabel.
Bernt Aasen, Director Regional di UNICEF pa Latino America y Caribe a bisa: “Den e momento aki, ignora e hechonan real ariba e pandemia aki, ta pone den peliger e bida di e hobennan y nan famianan”.
Hendenan jong mester comprende cu actualmente nan necesidadnan pa socialisa mester wordo limita pa un periodo. Tur actividad social mester wordo posponi, esaki ta inclui reunion di cualkier “size” pafo di cas, na cas di amigo, parke, restaurant, tienda, beach of cualkier otro lugar y hasta den nan propio cas.
E yamado ta pa nos hobennan y adulto hoben pa bira e forsa cu ta bay frena e contagio na nos isla, boso ta e yabi pa stop di plam’e. Nos ta sigur cu por!
