ORANJESTAD,Aruba
11 juni 2020: Diaranson a tuma luga den forma simbolico donacion di CIBC FirstCaribbean Aruba di e bunita suma di 10 mil dollar na Dr. Horacio E. Oduber Hospital. Un momento sigur special na unda tabatey presente sr. Gregory Croeze di Hunta di Directiva di Hospital y sr. Giovanni Atencio, Country Head CIBC FirstCaribbean. Un gesto cu ta di aprecia y lo ser uza specificamente pa gastonan di Covid-19 cu Hospital a haci ultimo luna nan pa por a cumpra extra material, testkits etc. pa por atende tur caso cu presenta.
Por a compronde durante e combersacionnan entre Hospital y CIBC FirstCaribbean Aruba cu e banco Regional ta percurando pa asisti diferente pais den region den e compra di e tan necesario COVID-19 testing kits. E meta principal tras di nan donacion ta pa hunto gana e lucha contra Covid-19.
Sra. Colette Delaney cu ta Chief Executive Officer a remarca cu “tests ta un di a arma nan mas esencial contra e plamamento di e virus, tambe pa identifica y isola esnan afecta pa asina limita e contagio”. Alabes CIBC FIRSTCARIBBEAN Aruba a elogia e trabou di Hospital haci durante e ultimo lunanan. Sigur algo aplaudi mirando e empeño cu ta hinca pa mantante nos comunidad sano y salbo . Hunta di Diectiva, management y personal di Hospital kier a gradeci CIBC FIRSTCARIBBEAN Aruba pa e bunita gesto di 10 mil dollar destina pa contribui na e lucha contra COVID-19