Den cuadro di transparencia y alabes pa duna claridad na nos clientenan, pashentnan y bishitantenan Horacio Oduber Hospital ta publicando ya desde luna di mei 2023 mensualmente diferente cifra di loke ta sosode na nos Hospital pa loke ta cuido, diagnostico y tambe donacion di sanger.
Durante luna di augustus 2023 a hospitalisa 793 pashent di cual 55,2% tabata hende muhe y 44,8% tabata hende homber. Di e 793 pashent un total di 447 pashent a drenta cu emergencia, 224 pashent tabata admision planea y 122 tabata pashent via policlinica admiti cu emergencia. Cada pashent cu a hospeda
den Hospital a keda un promedio di 4,1 dia y durante luna di augustus e ocupacion di cama tabata na 86% cu ta mas abou compara cu luna di juli cual tabata 94,7%.
Un total di 567 operacion a tuma luga na augustus cu ta 39 operacion mas compara cu na luna di juli. A nace un total di 83 baby (44 mucha homber y 39 mucha muhe). Tambe na augustus nos heroenan a pasa Bloedbank y a haci un total di 237 donacion di sanger cu ta 31 donacion mas cu luna pasa. Departamento di Emergencia a mira na augustus un total di 2.592 pashent di cual 1.109 pashent (42,8%) no tabata caso di emergencia. Interesante awo ta pa mira cu pashentnan cu no tabata caso di emergencia na luna di mei tabata
58,3% y awo compara cu augustus e ta na 42,8%. Por mira cu tin un rebaho drastico na departamento di emergencia di -15,5% menos di pashent cu no ta caso di emergencia si compara luna di mei cu augustus.
Un cambio sumamente positivo mirando cu awo mas pashent ta bay nan dokter di cas of dokter na warda pa casonan cu no ta di emergencia y asina Hospital su departamento di emergencia por atende casonan di emergencia. Specialistanan den servicio di HOH a haci durante luna di augustus un total di
7.014 consulta cu pashent na e diferente policlinicanan. Departamento di Radiologia a haci un total di 5.220 test manera CT scan, MRI y mas cual ta 549 test mas cu durante luna di juli. Un total di 11.592 persona a bay departamento di LABHOH pa haci nan test y total di 799 pashent a sali for di Hospital.
Danki na team completo di HOH cu semper t’ey pa brinda cuido di calidad cu un sonrisa pa tur pashentnan, bishitantenan y henter comunidad di Aruba.