Biblioteca Nacional Aruba ta presenta un encuentro Literario-Cultural, diaranson awor, 29 di
mei 2024, di 6.30 pa 9.00 di anochi na George Madurostraat 13, Oranjestad. Durante e
programa lo tin enfoke riba e diferente disciplinanan, entre otro Literatura, Arte, Cultura,
Linguistica y Educacion en general. Tin presentacion di charla, musica, canto, baile,
declamacion y exposicion.
Como huesped for di Hulanda ta presente e autor y poeta sra. Frida Winklaar-Domacassé.
Tambe Steve Francees, artista pintor di Aruba, ta duna un presentacion. Tambe lo tin
agasaho musical di e banda Ash & Friends. Grupo di baile Club di Movemento ta presente
pa deleita cu algun baile.
Autor-poeta, Frida Winklaar-Domacassé, lo ricibi un homenahe pa su obra literario. Frida ta
miembro di e organisacion artistico Simia Literario na Hulanda. Lo tin atencion special pa
Adinkra, e ultimo obra literario di Frida Winklaar. Ta trata di un edicion special den cuadro di
Conmemoracion di Pasado y Herencia di Sclavitud 2023. Recientemente a presenta e buki
Adrinkra na Hulanda. Awor Aruba tin e honor pa presenta e ultimo obra di Frida Winklaar-
Domacassé. Adinkra ta simbolonan cu nan raisnan na Ghana y Costa Marfil. Nan tin nan
propio nificacion y mescos cu proverbio ta expresa sabiduria di bida.
Steve Francees ta duna un presentacion di algun di su pinturanan dedica na Aruba y
Boneiro, pero tambe na pintura/cuadro relaciona cu e tema di Conmemoracion 160 aña di
Sclavitud.
Grupo di baile Club di Movemento lo demostra algun baile. Scol di baile Club di Movemento
ta bou di guia di Samantha Westera-Juppa den cooperacion cu Vivian Maduro-Crespo.
Tambe lo tin actuacion di diferente artista cu lo duna nan presentacion den canto y
declamacion, manera Karina Maduro, Ariana Koolman-Chirino, Aurelia Croes y John-Freddy
Montoya. E banda musical Ash & Friends, consistiendo di e musiconan Ash, Shurby, Vio y
Chicho lo ta presente pa deleita publico cu musica bailabel Latino-Caribense.
Ta un anochi hopi special cu un programa varia presenta pa Biblioteca Nacional Aruba,
Departamento di Cultura Aruba hunto cu Gestor Cultural Mirto Laclé. Lo presenta un
programa pa celebra nos multiculturalidad y multilingualidad. Publico en general ta bon bini.
Autor y poetanan bini pa apoya y celebra bida. Entrada pa e evento ta gratis. Pa mas
informacion Mirto Laclé, tel 742 6274.