.Loke a bira e Status Aparte despues
E fecha 18 di maart ta core manera un liña cora den historia di Arubab caminda 18 di maart a wordo scohi pa introduci nos simbolonan nacional: nos bandera y nos himno.
Celebracion di Aruba su dia nacional, su Status Aparte ta wordo celebra riba e fecha 18 di maart y esaki tin su motibo ya cu e tin su historia palpante su tras.
Un historia cu tey pa generacionnan cu bin ya cu 18 di maart no ta un fecha cu a wordo scohi sin mas caminda e aña aki, Aruba ta recorda cu 45 aña pasa, nos bandera a bay laira pa prome bes den Wilhelmina Stadion mientras a canta ‘Aruba Dushi Tera’ cu a bira e himno nacional.
Awe, 18 di maart 2021, Aruba ta celebra su di 35 aña di Status Aparte cu ta e dia cu Aruba a bira ‘baas den su mes cas’, despues di un lucha largo y tenas cu a cuminsa na inicio di siglo 20.
18 di maart 1948
Entre 28 di september 1947 y 11 di januari 1948, e lidernan politico Henny Eman sr., su yiu Albert ‘Shon A’ Eman y Aristides Wever, compaña pa Juan Chabaya ‘Padu’ Lampe, a organisa no menos cu 42 encuentro rond Aruba.
Esaki den un tempo cu no tabatin e infrastructura cu tin awe. Lampi di kerosin tabata ilumina e reunionnan aki pero un pueblo determina y consciente tabata asisti pa firma un peticion pa ta ‘baas den nan mes cas’.
Resultado di e encuentronan aki tabata un peticion cu nomber y firma di 2147 hombernan Arubiano caminda e tempo ey hende muhe no tabatin derecho di voto ainda.
E 2147 Arubianonan balente y yen di curashi aki a duna muestra di e determinacion di un pueblo pa yega na su soberania caminda e protesta, e anhelo pa ta ‘baas den nos mes cas,’ no tabata algo nobo den e temponan ey pero si tabata pa prome bes cu Arubianonan a tuma un posicion firme y esaki a duna su frutonan.
E hoben politico Shon A Eman hunto cu un delegacion a biaha pa Hulanda y durante un conferencia di Mesa Rondo, cu simbolicamente ta marca e igualdad cu tabata kier den Reino, Shon A Eman a haci entrega di e peticion na su Mahestad Reina Wilhelmina.
Algun siman despues, riba un diamars 18 di maart 1948, Shon A a entrega den nomber di Aruba un mocion den cual e ta pidi un ‘uitzonderlijke status’, e status aparte pa Aruba den Reino.
Shon A, kende a keda Den Haag mientras su delegacion a regresa Aruba, durante un discurso ardiente y conmovedo a convence e delegacionnan di Hulanda, Corsou y Surnam durante final di e Conferencia di Mesa Rondo, cu Aruba tin e derecho di tin un posicion extraordinario dentro di Reino.
E mocion di 18 di maart 1948 y e peticion cu nomber di e firmantenan a keda acepta y a bira e fundeshi di nos autodeterminacion dentro di Reino Hulandes y a para na cuna di nos Status Aparte.
Tur aña Aruba ta celebra e balentia y determinacion di esunnan cu a bay nos dilanti.
Esaki ta wordo haci na monumento 18 di Maart durante un homenahe na tur esunnan cu den e periodo entre september 1947 y maart 1948 a cuminsa construi e fundeshi aki.
Na Monumento 18 di maart ayera mainta un biaha mas a rindi homenahe na e 2147 firmantenan, hendenan grandi cu a haci e pais grandi.
Fuera di e homenahe aki, tambe partido AVP cu su lider Mike Eman, a pone krans na Plaza Betico, tambe na Plaza Juancho Irausquin y Plaza Henny Eman recordando e lucha grandi pa autonomia di pais Aruba.
