E Centro Operacional Maritimo (MOC) di Wardacosta, diabierna ultimo a risibi un notificacion cu un persona cu lo a huur un jetski na Aruba, un turista hende homber, lo ta perdi riba lama.
MOC mesora despues di e notificacion a dirigi e avion di Wardacosta, e helicopter di
Wardacosta y un Metal Shark pa e sitio caminda e persona y e jetski por tawata. Unidatnan di Wardacosta huntu cu e helicopter di Cuerpo Policial Aruba a busca e homber y e jetski te diabierna parti anochi, sin resultado positivo.
Henter fin siman Wardacosta a laga su unidatnan di buelo y un boto di patruya hasi e busceda di e homber y jetski. A base di un plan di busceda y rescate y un asina yama ‘search box’ riba lama, unidatnan di Wardacosta a sigi cu e busceda. Tambe un informacion di Navtex a ser manda pa botonan den e area cu e mensahe cu Wardacosta ta buscando un homber perdi y un jetski, cu e peticion pa botonan tira un bista riba lama. Wardacosta te cu diadomingo atardi no a localisa e homber ni e jetski y e dianan benidero lo mantene vigilancia riba lama pa cu e homber y lo keda monitoria e situacion.
