Un primicia pa Horacio Oduber Hospital (HOH) Aruba, Caribe Hulandes y region unda recientemente pa prome biaha a implanta cerca tres pashent di Aruba un protesis di rudia completamente traha na midi y mas miho ainda e pashentnan ta sinti nan mes hopi bon!
E protesis di rudia modelo ORIGIN® di e compania Suiza Symbios ta wordo geprint 3-D a base di imagennan di CT di e rudia di pashent. Door cu e modelonan di zaag ta completamente traha riba midi, e rudia ‘nobo’ ta fit e pashent perfecto mane e rudia original. Esaki ta haci e recuperacion mas lihe y tambe ta duna e pashent e libertad pa haci movecionnan manera prome hopi rapido despues di e operacion. Ademas mester di hopi menos instrumento y material pa haci e operacion. Esaki ta yuda Hospital den nos meta di ta mas sostenibel y alabes e pashent tin hopi menos riesgo pa haya infeccion. E revolucion den loke ta protesis di rudia ta trece inovacion pe comunidad di Aruba y mas ainda, un aumento den calidad di bida.
E ciruhano ortopedico di HOH, dr. Patrick Haimé a ehecuta e operacionnan hunto cu e ciruhano ortopedico dr. Peter Wartmann. Wartmann ta labora na un clinica renombra na Suiza, esta Hirslanden Kliniken, unda ya caba ela realisa un 300 operacion unda e la pone e protesis Symbios ORIGIN® cerca pashent.
E meta: un miho calidad di bida pa e pashent
“Normalmente ta implanta un rudia cu un tamaño standard. E Symbios ORIGIN® ta wordo fabrica completamente na midi, pues traha y diseña specialmente pe pashent concerni. Por compara esaki cu e diferencia entre un paña di tienda size standardisa of un paña traha na midi cerca un costurera. E Symbios ORIGIN® ta duna rudia di e pashent un miho funcion y siguramente lo percura pa aumenta e calidad di bida. Mi ta mira e futuro y ta spera cu por haci hopi mas pashent feliz cu e protesis aki”, segun dr. Haimé.
Precision Suisa
Dr. Wartmann tabata impresiona y ta di opinion cu esaki tabata un tremendo oportunidad pa Aruba, pa ta e prome pais pafo di Europa pa ofrece Symbios ORIGIN® na comunidad di Aruba. “E ta un bunita experiencia di a asisti e operacion y tin influencia riba algo asina special cu ta mehora calidad di bida”, segun Wartmann.
Orguyoso
“E protesis nobo aki lo trece nos otro paso mas cerca di e vision di HOH: clientenan satisfecho y empleadonan feliz. Atrobe un paso positivo pa mehora nos calidad y servicio pa nos pashentnan y comunidad di nos bunita isla Aruba. Mi ta contento cu e cooperacion entre tur empleado envolvi a bay tremendo. E ta lagami sinti orguyoso como director pa por a trece un sonriso na tanto personal y pashent!”, segun director di HOH drs. Jacco Vroegop.
Evolucion medico
Hans van den Berg, representante di Symbios, ta contesta e pregunta dicon e protesis aki ta uno superior y ‘patient friendly’ compara cu otro y protesis di antes. “E tamaño di un implante ta manera un sapato. Si bo tin un tamaño demasiado chikito e ta haci dolor y tambe si e ta mucho grandi e lo haci dolor. E Symbios ORIGIN® ta un protesis di rudia traha perfectamente pa adapta na e weso den su totalidad, segun e pashent su anatomia. E ta cuminsa cu un CT scan cu ta un potret digital di e weso. Cu e database aki por genera un algoritmo cu ta converti den e mecanismo aki. Pues, ta un computer cu ta calcula e tamaño specifico di e implante y ta print esaki. Cada protesis ta unico y ta diseña explicitamente pe pashent concerni. Ya caba na Europa tin mas di 15.000 pashent cu a ricibi e protesis di rudia na midi aki.” Y awo tambe 3 pashent pafo di Europa – pues ta bunita cu e momento historico aki a tuma luga na nos isla di Aruba!
