Durante e ultimo siman tras di lomba, Dr. Horacio E. Oduber Hospital a muda diferente departamento pa nan localidad nobo y completamente renoba. Algun di nan a muda cu e simpel proposito pa asina por start cu renobacion den e hala oost di e edificio principal, conoci como Toren A.
Un bon planning ta esencial den esaki, entre otro e transport di material, e necesidadnan riba tereno boticario, IT, interieur, limpiesa, issuesnan tecnico y mucho mas. Ful e proceso di muda a rekeri hopi ora di preparacion y un cooperacion inmenso di diferente departamento. Pues alfinal cada biaha e enfoke ta pa minimalisa molester pa pashent, bishitante y tambe trahado.
Pues di siman pasa a muda departamentonan di cuido A4 di un banda pa e otro banda riba di cuater piso mes. Tambe a muda departamento di B4 pa nan localidad nobo na piso 2 den Toren A, esta A2. Tambe a logra muda A3 pa nan localidad nobo e otro banda di mesun edificio.
Departamento di wondenpoli tambe a conoce un localidad nobo y awo ta situa den Area A na bo man robes asina cu drenta entrada principal actual di HOH.
Despues di algun trabounan lo sigui cu e planning di algun otro mudansa cu ta necesario pa e banda di edificio principal keda bashi y asina por cuminsa renoba esaki. Alabes lo sigui cu trabounan na entrada principal pa asina mayoria di e “scope” completo di e proyecto grandi por keda cla.
Hospital ta sumamente contento cu e cambio positivo ya cu e localidad nobo tin hopi bentaha pa e pashent; e ta mas amplio, priva y empleadonan por traha na un manera mas eficiente cu ekipo y cama mas nobo. Danki ta bay na e team completo di Bouw di HOH hunto cu nan team di diferente departamento di HOH cu a haci’e posibel y trankilo pa nos pashentnan.
No por keda sin gradici tambe e team di SOGA y Land Aruba pa e tremendo cooperacion pa e proyecto di renobacion y construccion di Hospital di Aruba.
Trahando na un manera responsabel y sigur p’e pashentnan ta un prioridad fundamental pa e institucion aki. Na final di e proyecto, Hospital lo por brinda mas y miho cuido na tur pashent.
