Diamars anochi den un ambiente super alegre a tuma luga e graduacion di 18 nurse cu awor por cuminsa nan carera nobo den nan specializacion den enfermeria, di cual 15 ta coleganan na Horacio Oduber Hospital y 3 ta coleganan di ImSan.
Nan a specializa den e area di of ICU/CCU, emergencia, cuido cardiaco, recovery, dialisis y intervencion cardiovascular. A logra trece e estudio pe specialisacionnan aki, danki na e colaboracion estrecho cu Horacio Oduber Hospital tin pa hopi aña caba cu VUmc Amstel Academie Amsterdam Hulanda. Un estudio sumamente importante pa Aruba mirando e necesidad cu tin di personal den cuido y mas ainda personal specialisa. Ademas, loke ta bunita ta cu nos propio hendenan riba e isla aki a aplica y ta mira nan futuro yudando nos comunidad riba tereno di cuido.
Hospital ta pone hopi enfasis riba profesionaliza y specializa pa asina eleva calidad di cuido. E profesionalnan aki a mustra di ta comprometi cu hospital, comprometi cu comunidad, pero tambe tin perseverancia enorme pa logra nan meta. Y na nan turno, t’e studiantenan aki mes lo sigui educa otronan den futuro. Hospital ta orguyoso di por a logra e echo aki y asina sigui mehora e calidad di cuido brinda na comunidad. Lenie Denteneer, Manager HOH Academy, a expresa cu “nos ta sumamente orguyoso di e studiantenan cu a termina nan estudio specialisa cu exito y awo ta cla pa continua cu nan carera profesional den cuido”.
Ana Mejia, kende a gradua como nurse specialisa den emergencia (SEH), a inicia e estudio y oficialmente awor tin e titulo di SEH Verpleegkundige. “Mi a scoge pa ta un SEH Verpleegkundige, pasobra ta trata aki di un departamento cu hopi dinamica y tambe cu ta mira diferente categoria di pashent cu ta algo cu ta atra’e. “Tur dia mi ta siña diferente cos, sea ta algo chikito of algo grandi. Loke cu ta haci e departamento aki uno atractivo ta cu semper e ta varia.
Un logro cu Aruba sigur por ta orguyoso di dje paso por conta cu mas nurse specialisa pa brinda cuido riba departamento di ICU/CCU, departamento di Emergencia, Dialisis , Departamento di recovery y tambe pa loke ta Intervencion di Cardiologia. Team dinamico di HOH Academy a guia e proceso aki completo hunto cu e team di VUmc Amstel Academie Amsterdam Hulanda cu a yuda p’e profesionalnan aki por a crece den un carera nobo den cuido.
Hunta di Directiva y team di maneho di HOH ta orguyoso y ta manda palabra di pabien na e diesocho graduadonan cu a demonstra cu cuido y e pashent ta prioridad pa nan.
