Dos aña y mey despues di e sentencia di Corte di Prome Instancia, awo ta toca turno pa Hof, presidi pa tres Hues, atende cu e caso prome caso grandi di soborno politico cu Aruba a conoce: IBiS. Un caso den cual e principal acusado ta un ex mandatario drs. Paul Croes.
Na inicio di e aña aki tabatin e prome session cu mester a conduci na tratamento den forma profundo di e caso IBiS den Hof. Tabata trata di un Regie Zitting, unda cu abogadonan y ministerio public por a haci peticion na Corte di kico mas nan mester pa investiga prome cu cuminsa cu tratamento.
E acusadonan den e apelacion ta: Paul Croes; Melony Croes-Paesch, Yvonne Martinus; Ninosca Nunez; Jairo Wever y Robbio di Vechia. Di e grupo aki, Nunez, Martinus y di Vechia a haya vrijspraak pero Ministerio Publico no tabata di acuerdo pa cual a dicidi di apela e decision. Den e caso di pareha Croes, nan no tabata di acuerdo y a dicidi di apela. Jairo Wever a sinti cu e ta inocente pa cual no ta di acuerdo cu decision di Corte y a apela e sentencia. Jairo Wever ahaya un boet di 5000 florin di cual mita ta condicional, esta 2500 florin y 3 aña di prueba.
Hof a programa cuatro dia maximo pa tratamento di e caso aki, cuminsando dia 31 di augustus awo y finalisando 3 di September. Sentencia probablemente lo wordo anuncia despues di tres siman.
Exminister Paul Croes, a wordo condena den prome instancia na februari 2019 cu un castigo di cuatro aña pa corupcion, labamento di placa, maluso di funcion, dunamento ilegal di trabao y participacion na un organizacion criminal.
E caso IBiS a cuminsa na maart 2017 cu autoridadnan tirando diestras razia na cas of otro adresnan. Den e dos añanan cu a sigui, a interoga diferente persona. Den e prome sesion den Corte Ministerio Publico a cita 24 sospechoso di cual un so no a presenta.
E acusacionnan tabata varia pa grupo di acusado. Tin un grupo cu tabata wordo sospecha di a tuma regalo/promesa y pa labamento di placa. Otronan a wordo acusa di: complice activo di soborno; estafa, falsificacion; traficacion di hende; soborno di ambtenaar; malversacion y posesion di documentonan falsifica y e hecho di ta pertenece na un organisacion criminal cu e meta pa comete actonan contra ley.
Tur e delitonan aki, relaciona cu e famoso palabra “ontheffing” cu e ex mandatario, como e persona cu labor tabata duna na stranheronan.
Di e 23 personanan cu a presenta den Corte na 2019, cinco a haya vrijspraak di e acusacionnan haci contra nan; nuebe di nan a haya castigo den forma di un boet (basta halto), dos a haya castigo di prison y 3 di e acusadonan a haya castigo cu trabou comunitario.
E fiscal cu a trata a trata e caso aki den Prome Instancia mientrastanto a bolbe Hulanda. Hues cu a trata e caso den Prome Instancia tabata uno cu a bini di Corsou.
Hof ta cla pa apelacion di prome caso grandi di soborno politico di Aruba IBiS
