Casi 1.20 di awe merdia Hof por medio di video call a lesa e sentencia den caso IBiS den apelacion. Dos di e seis acusadonan a wordo declara liber y 4 a haya condena. Pero en general por bisa cu tur e castigonan a cambia en comparacion di loke e tabata den prome instancia.
Pa cuminsa OM a apela e caso di Yvonne Martinus, pero e PG mes a pidi pa declar’e liber y Hof a bay di acuerdo. Jair Wever a apela pa motibo cu e no tabata di acuerdo cu e sentencia di culpabilidad. Hof tabata di acuerdo cu ne. No por a proba cu e donacion tabata un soborno. A declar’e liber di esaki.
Ninosca a haya 4 luna condicional y tres aña di prueba.
Den prome instancia el a haya mas cu 200 ora di trabou pa comunidad. Esaki Hof a baha na 150 ora (kitando 52 ora cu el a pasa deteni) of 65 dia cera.
Den e caso di Robbio di Vecchia cu a bende Paul Croes airco, Hof a haya e castigo pidi exagera. El a dun’e solamente 2 siman, pero condicional y 3 aña di prueba. Hof a bisa cu e prijsnan cu el a duna tabata mucho special pa cual a haya soborno proba.
A declara Melony Croes Paesch liber di labamento di placa, e acusacion di mas pisa. A constata un administracion malo pero no labamento di placa. Si ta haya proba uzo di un persona cu no tabatin su documentonan na ordo. Pues un ilegal. Pa esaki, a conden’e na 120 ora di trabou pa comunidad.
Finalmente, Paul Croes a wordo haya culpabel di e delitonan trata door di Hof. E tres Huesnan a conclui cu e forma cu el a traha como Minister di Labor, a sacudi ordo publico. El a manipula, pasa riba departamentonan den caso di ontheffingnan. Pa esaki a conden’e na 3 enbes di e 4 añanan cu el a haya den prome instancia. Y durante 8 aña e no por traha como ambtenaar ni bay den politica. Hof no a haya necesario pa bay di acuerdo cu e peticion di PG pa duna un ordo di detencion di inmediato.
Croes a bisa pafo cu e ta evaluando kico e lo bay haci awo.
