KRALENDIJK,Bonaire
UNICEF a lansa e proyekto ‘ Mi Mundo Nobo’ (Mijn Nieuwe Wereld) na Boneiru, Sint Eustatius i Saba. Desenas di hóben a reflekshoná riba e pregunta kon nan mundu ideal lo ta despues di Corona. A prosesá e kontestanan riba e pregunta aki den un konseho ku e hóbennan ta presentá na e gobièrnunan lokal i na gobièrnu hulandes.
Den estrecho sinkronisashon ku skolnan sekundario riba kada un di e tres islanan, a selektá un kantidat di partisipante pa partisipá na e gruponan di enfoke, den kua a bati kabes ku otro i traha riba e konsehonan. Hóbennan entre 13 i 18 aña a duna nan opinion tokante di tópikonan ku ta afektá nan. Temanan ku a bini dilanti ta por ehèmpel atenshon pa salú mental di hóbennan, un ambiente mas sigur pa kore baiskel i praktiká deporte i mas kuminda saludabel manera fruta i bèrdura pagabel. Speshalistanan edukashonal lokal a yuda e hóbennan pa kombertí nan ideanan den konsehonan di maneho (beleidsadviezen). Na Boneiru UNICEF Nederland ta traha ku Hermine Dongen, kende ta fasilitá e gruponan di enfoke i ta sostené e hóbennan pa formulá nan konseho. “Entusiasmá e hóbennan ta indiká ku gustosamente nan ke tuma parti na kòmbersashonnan i yuda pensa ora ta trata di inovashon pero ku finalmente mester tuma nan na serio. Ideanan di Mi Mundu Nobo lo tin impakto riba Boneiru, nos komo adulto mester sostené nos hóbennan di kurason” Hermine ‘Mimi’ Dongen, kordinadó lokal di Mi Mundu Nobo Boneiru.
Alumnonan
‘Mi Mundu Nobo’ ta dirigí riba hóben for di tur kapa di komunidat. Na Boneiru 22 hóben di Komunidat di Skol Boneriano a partisipá na e seshonnan di grupo di enfoke. E alumno Kadija Skeete a hañ’é un bon eksperensia:”Pa mi tabata hopi agradabel pa sinta den un grupo yen di mucha muhé i tambe pa mira ku nos tur ta pensa den mes direkshon. Tabata instruktivo pa skucha eksperensia di otro hende i siña di otro.” Na Sint Eustatius e grupo di enfoke tabata konsistí di 8 alumno di Gwendoline van Putten School. Na Saba 8 alumno di Saba Comprehensive School a duna nan konseho. A trese e konsehonan di e grupo di enfoke den forma di un enkuesta dilanti serka un grupo hopi mas grandi di hóbennan di manera ku nan por a indiká unda nan ta di akuerdo i unda nan no tabata di akuerdo.
Gobièrnunan
Ta kolekshoná e konsehonan i entregá nan ofisialmente na representantenan di gobièrnu lokal di Boneiru, Sint Eustatius i Saba. Na Boneiru e hóbennan ta entregá nan konseho personalmente na Diputado Nina den Heyer. Esei ta tuma lugá dia 10 di sèptèmber, e dia ku ta kompartí e konsehonan di Hulanda Karibense ku Sekretario di Estado Raymond Knops (BZK) na Den Haag. Ta agregá e konsehonan di Boneiru, Saba i Sint Eustatius na e konsehonan di e hóbennan di Hulanda ku tambe a traha riba e proyekto Mi Mundu Nobo aki i riba mes dia ta hasi entregá na Minister Hugo de Jonge (VWS). Fin di novèmber e hóbennan lo diskutí nan konsehonan ku e mandatarionan lokal riba nan isla. E hóbennan lo partisipá tambe na kòmbersashon via di konekshon di vidio bibu ku Sekretario di Estado Knops tokante di nan konseho. E hóbennan lo prepará nan mes pa e kòmbersashonnan aki mediante partisipashon na lobbytraining, entrenamentu di debate i seshonnan di práktika di debate ku hóbennan di otro isla.
Partisipashon di mucha/hóben
E proyekto Mi Mundu Nobo na Hulanda Karibense ta forma parti di e Programa di Derecho di Mucha Hulanda Karibense di UNICEF, finansiá pa Ministerio di Asuntunan Interno i Relashon di Reino. Ku e proyekto aki UNICEF ta enfatisá riba importansia di laga muchanan partisipá na kòmbersashonnan. “UNICEF ta haña importante ku muchanan ta haña oportunidat pa partisipá na prosesonan di toma di desishon i ku nan ta prepará pa pensa krítiko i ekspresá nan opinion” La-Toya Charles, lider di proyekto UNICEF Hulanda Karibense.