Hobennan di LEO Club Aruba cu directiva nobo

Aruba Lions Club cu mas di 75 aña sirbiendo comunidad tambe tin su hobennan den e LEO Club Aruba cu recientemente a caba di instala nan directiva nobo pa aña 2023-2024.

E hobennan aki durante aña leonistico cu a pasa, a hasi diferente projectonan hopi bunita den comunidad y sigur a jena nan CV cu experencianan unico manera charlanan cu nan a ricibi, reuniendo pa hasi actividadnan y siña con pa traha hunto y sigur experencia con ta hasi trabounan voluntario y tambe sirbi comunidad den e mihor forma. Ta hopi bunita pa mira e muchanan aki entre edad di 12 pa 18 aña, jenando nan tempo liber pa hasi actividadnan sano y pa un bon causa, asina demostra e speranza cu den futuro nos tin bon cuidadanonan den nos comunidad.

Den nan ultimo reunion a caba di eligi y instala e directiva nobo cu ta bou guia di Lion Liza Roberts encarga cu e muchanan di e LEO Club Aruba.

Den un votacion a keda eligi como presidente Alysha Roga y su vice-presidente Gjordjan Roga, secrataria ta Catherine Wernet y tesorero Dyron Arends.

Mescos cu directiva di Aruba Lions Club tambe nan conoce otro funccionnan cu a keda pa Nathan Croes tail twister, Shaquille Dirksz LEO Advisor y Lirienne Roga como Membership Chairperson. Awor ta un aña leonistico nobo caminda e directiva aki lo mester traha riba ideanan nobo pa projectonan pa comunidad y talvez sigui cu locual tin pendiente.

Nos ta spera di scucha hopi di e muchanan aki durante nan aña pa sigui cu e bon trabou di sirbi comunidad.

Un pabien na e directiva nobo y nos ta manda palabra di motivacion pa nan por tin un aña exitoso.

Aruba Lions Club mescos cu su LEO Club Aruba kier a hasi un invitacion na tur mayor cu ta desea pa nan yui join e LEO Club Aruba, por jama cualkier miembro of via Facebook pa haya mas informacion of por tuma contacto cu Aruba Lions CLub.

Un hoben mas cu ta siña pa hasi actividadnan sano, tin sigur di ta un bon adulto den futuro pa un bon comunidad.