Hóben yu di Kòrsou kier krea oportunidat pa hóbennan desaroyá den mundu di nabegashon

Resientemente Frakshon di MFK a risibí bishita di e hóben yu di Kòrsou,  Suwentley Concinion. Ta trata di un hóben yu di Kòrsou di apénas 28 aña di edat, ku pa  luna di desèmber próksimo lo terminá su estudio komo Kapitan di barku (tanker ku un  kapasidat di 4 mil 193 tòn). 

Suwentley Concincion a splika Frakshon di MFK ku aki na Kòrsou el a bishitá  primeramente Prinses Margriet pa despues el a bishitá St. Antoniusschool na Sta.  Maria. Despues el a bishitá Stellamaris College. Despues di a terminá su VSBO, el a bai  Ulanda, kaminda el a drenta servisio obligatorio. 

Despues buskando trabou e tabatin un amigu ku tabata traha riba barku, ku a aserká e  kompania pa kual e tabata traha, p’asina Suwentley por a haña un oportunidat di  trabou. El a kuminsá komo “deksman”, pa despues sigui e estudio di matros. Un estudio  ku un durashon di dos aña, pero kual el a logra terminá den apénas 3 luna. El a traha  komo matros, pa despues sigui e estudio di “Stuurman”. 

Mirando su entusiasmo, e empresa “Unibarge” a tuma Suwentley Concincion den  servisio permanente i a ofresé e posibilidat pa hasi e studio komo “2de Kapitein” i  despues komo “Kapitein”. Suwentley a tuma e oportunidat aki i un estudio kual tin un  durashon di seis aña, e ta terminando den kuater aña den luna di desèmber próksimo.  Ku realisashon dje estudio aki, e hóben yu di Kòrsou Suwentley Concincion lo por kore  barkunan (tanker) di 110 meter largu, 11.5 meter hanchu, ku un kapasidat di 4 mil 193  tòn. 

Suwentley Concincion su soño ta pa den futuro, duna hóbennan yu di Kòrsou e  oportunidat pa por forma nan mes den e mundu naviero. Despues di terminá e estudio  di Kapitan, Suwentley lo kier kontinuá ku un estudio di seis luna ku kual e lo optené e  lisensia pa por tin su propio barku i nabegá barkunan di kualkier tamaño i den kualkier  teritorio i sin límite di tonelada. 

Suwentley Concincion a splika Frakshon di MFK ku den futuro e lo kier regresá Kòrsou  ku su propio barku, p’asina brinda hóbennan yu di Kòrsou oportunidat di formashon i  trabou den e mundu naviero. 

Frakshon di MFK a hasi un opsekio na Suwentley Concincion i ta spera ku pronto e lo  por ta bèk na Kòrsou pa realisashon di su soño, pero prinsipalmente krea oportunidat  di formashon i trabou pa hóbennan lokal.