Despues di a invertí tempu den krea oportunidat pa hóbennan boneriano pa asina nan por tin mas influensia riba solushonnan i desishonnan pa Boneiru, Anthony ‘Sion’ Janga mes a risibí un oportunidat di oro. Anthony ‘Sion’ Janga ta bai traha pa algun luna na Stichting Rotterdam The Hague Airport. Esaki ta un fundashon ku ta kai bou di Rotterdam The Hague Airport i Schiphol Group kaminda nan ta enfoká riba trese solushonnan pa hasi aviashon mas sostenibel. E fundashon akí ta okupando su mes ku vários proyekto, manera produkshon di kombustibel sostenibel pa avion, mehorá eksperensia di pasaheronan na aerpuerto, realisá avion ku ta bula riba koriente i hidrógeno, introdusí ‘drone’ riba tereno di aeropuerto i tambe un laboratorio kaminda nan ta eksperimentá ku diferente produkto i servisio pa hasi aviashon mas sostenibel, seif i barata. Anthony ‘Sion’ Janga ta bai partisipá den e proyektonan akí. Esaki ta un notisia importante kaminda un hóben boneriano ta bai yuda krea solushonnan ku lo tin un impakto grandi riba hende, tantu direktamente komo indirektamente.
Traha i studia
Algun luna pasá Embry Riddle Aeronautical University ku ta e universidat di aviashon mas grandi na mundu a aseptá Sion Janga pa sigui su estudio di bachelor den aviashon na Daytona Beach, Florida. Pero mirando e oportunidat ku Sion Janga a haña na Hulanda, e universidat a disidí di transferí Sion pa e ‘campus’ ku nan tin na Oropa ku ta keda na Frankfurt, Alemania. Esaki ta nifiká ku Sion ta kombiná su trabou i su estudio, biahando entre Den Haag i Frankfurt pa asina risibí konosementu teorétiko i pone esaki den práktika pa mehorashon i sostenibilidat di aviashon.
M21 i partisipashon di hóben
Na Boneiru Sion Janga ta sostene i forma parti di e organisashon Movementu 21 (M21) di Daisy Coffie. Un di M21 su punto nan di lansa ta pa envolví hóbennan mas den polítika i gobernashon na Boneiru. Sion ta di opinion ku mester duna hóbennan oportunidat pa partisipá, yuda pensa i tuma desishon tokante maneho general di nos isla, i spesialmente e maneho ku ta regardá hóbennan. Segun Sion partisipashon aktivo di hóbennan ta engrandesé nan konfiansa propio i nan outoestima. Partisipashon aktivo ta kontribuí tambe na desaroyo personal, sosial, emoshonal i moral di nos hóbennan. Komo konsehal di Frakshon Coffie i lider polítiko di M21 sigur Daisy Coffie i otro lidernan di M21 ta para tras di e lucha di Sion Janga pa partisipashon efektivo di nos hóbennan i ta sostené Sion 100% den su reto pa logra esaki tantu na nivel insular komo riba nivel di Reino.