Historiadó Max Elstak : Sin resistensia no tin viktoria pa Korsou

E historiadó sr. Frank Max Elstak pa duna lès den e proyekto
“Patriotismo” di Akademia Popular Errol Scoop, e ala di formashon di Movementu
Politiko Kousa Promé. Elstak ta sali for di e pensamentu básiko ku elementunan
afrikano-kurasoleño ta dominá den kultura i historia di Kòrsou. Ta p’esei mester kibra e
ignoransia serka e yu di Kòrsou di desendensia afrikano. Pa logra esaki mester kombatí
pobresa kultural mental ku un kosmovishon afrikano. Ademas mester ofresé un fluho
konstante di informashon históriko kultural. E formashon emansipatorio mester inkluí
konosementu di e historia di resistensia, resiliensia i restorashon di gruponan étniko
kultural na Afrika i den diáspora afrikano. Señor Elstak ta di opinión ku komo
desendiente afrikano mester interpretá historia for di un perspektiva afrikano i diáspora
afrikano. E pensamentu ideológiko pan-afrikano mester ta un guia pa e lucha di
emansipashon. Elstak ta hiba e pensamentu ku mester establesé reparashon pa
restorá e herensia tangibel, intangibel i mental afrikano. Aplikando e perspektiva
kosmovishonario afrikano lo yuda e yu di Kòrsou bira e sentro di su propio liberashon i
emansipashon. Esaki lo habri kaminda pa e yu di Kòrsou di desendensia afrikano
rekobrá su identidat i realmente aseptá su mes i sali dilanti pa su propio bienestar.
Esaki lo proba e yu di Kòrsou por basta si e ke. E yu di Kòrsou liberá mentalmente lo ta
un kolektividat kultural ku su propio historia, norma, balor, herensia kultural, históriko i
natural i ku su propio patrimonionan, éruenan, baluartenan i logronan. Adoptando e
vishon kósmiko afrikano e yu di Kòrsou lo bandoná e vishon ku Europa a imponé den
dje e último 5 siglonan. Europa a konsiderá e afrikano i su desendientenan komo
suphumano dirigí pa un instinto di animal.
E vishon euroséntriko ta konsiderá e afrikano sklabisá un viktima ku no a logra
komprondé i adaptá su mes na su estado nobo komo katibu. Pa e europeo sklabisá i
dehumanisá hende ta un prerogrativo europeo i algu masha normal. E sosio
inseparabel di e europeo kolonisadó tabata e imperio katóliko romano komandá pa
Papa di Roma.
Resistensia afrikano na Afrika i den diáspora afrikano ta un fenómeno universal
sumamente importante ku ta base sentral di tur lucha pa emansipashon real. E vishon
europeo no ta rekonosé resistensia komo un fenómeno universal. Esaki debí ku e
europeo den su vishon euroséntriko ta konsiderá e sistema di sklabitut i komèrsio di
hende komo ideal i perfektamente den kuadro di loke nan ta konsiderá i propagá komo
etiko. E kontrali ta bèrdat ora nos analisá e atrosidatnan manera genocidio, tortura,
eksplotashon i dehumanisashon ku e opresor europeo a kometé kontra e afrikano i su

desendiente den diáspora. Sr. Elstak a trata un lista di lucha i luchadó ku a resistí i
duna guia na e lucha i gueranan di resistensia den diáspora afrikano. Tur kaminda ku
tabata tin sklabitut afrikano tabatin resistensia. Un resistensia abierto i skondí. E
resistensia tabata total i for di un inisio di e barbaridat europeo. E resistensia a start na
Afrika, sigui na bordo di barkunan negrero i den diáspora. Menshonabel ta e promé
komunidat ku a resistí kanta gloria di liberashon den kabamentu di sigo16 i komienso di
siglo 17. E komunidat afrikano brasileño Quilombo, Palmares na Brasil
Zumbi Dos Palmares tabata e lider di resistensia kontra atakenan konstante di hulandes
i portogesnan. Elstak a trata tambe Coffy e lider di rebelión na Berbice.
Francois Mackandal ta otro gran pensado i luchado. Su vishon tabata pa uni tur
forsa afrikano i kore ku tur hende blanku for di Haiti. Disipliná i organisá tur luchado via
retnan komunitario. E meta final tabata: independensia i destrukshon di e poder di
blankunan na Haiti.
Di Mackandal a sigui Boukman Duty. Boukman Duty ta para pa resistensia harmá. Su
vishon tabata spiritualidat afrikano ku su nukleo vishonario kosmológiko KEMET. E ta
ser konsiderá e arkitekto filosófiko di independensia di Haiti.
Parti di e siñansa di Boukman ta ku e ta konsiderá e Dios di e hende blanku e Dios ku
ta inspirá e blanku pa kometé krimen. Pero nos Dios ta inspirá nos pa hasi kos bon so.
Fuera di ku mester lucha pa un viktoria militar armá e ta boga tambe pa restorashon
kultural. Un ke otro den liña di siñansa i sabiduría di antiguo KEMET.
Finalmente Jean Jacques Dessalines a logra derotá trupanan kolonial di
Napoleon i deklará Haiti pais liber i independiente.
E promé gran resultado di resistensia afrikano ta Haiti, e promé repúblika liber ku a
bringa su libertat kontra Fransia na 1804.
Asina por konstatá ku sin resistensia nunka lo tin viktoria.