Resientemente lider di partido Elvis Tjin Asjoe a tuma su retiru komo diputado pa e por atendé ku su situashon personal. Direktiva di partido a reuní i a disidí ku
Hennyson Thielman
lo asumí e responsabilidat di diputado komo remplasante di sr. Tjin Asjoe. Sr.Thielman a traha komo konsehero pa sr. Tjin Asjoe kasi 2 aña i ta konosí ku e materia i lo por sigui ku e trabou nan ku ta andando.
Banda di esaki partido ta hasi algun kambio mas. Konsehal Joselito Statia i konsehal Renata Domacassé tambe a retirá for di nan funshon den Konseho Insular. Oportunidat i reto profeshonal nobo ta pone ku difisilmente por kombina e funshon di miembro di konseho insular ku trabou regular na satisfakshon di ambos miembro.
Na momento ku partido a risibí e karta di retiru di sr. Statia i sra. Domacassé direktiva a hasi un apelashon riba sr. Tjin Asjoe pa e por drenta konseho insular na lugá di sr. Statia pa duna sosten na e miembro nan di konseho insular ku su eksperensia. Aunke pasando den su momento nan difísil sr. Tjin Asjoe a aseptá pa asina sigui duna su banda na gobernashon di nos isla. Pa remplasá sra. Domacassé direktiva a hasi apelashon riba sr. Edwin (Din) Domacassé pa drenta konseho insular.
Sr. Din Domacassé tambe a aksepta e reto. E ta un di e hendenan ku for di kuminsamentu di MPB ta forma parti di e partido i desde 2018 sr. Din ta ehersé e funshon di miembro di direktiva di partido. Partido tin hopi konfiansa den su persona i ku e lo por hasi e trabou aki bon.
Sr. Statia i Sra.Domacassé, ambos miembro di partido fo’i prinsipio, lo sigui ehersé otro funshon den partido i lo sigui sostené gobièrnu kaminda por na bienestar di pueblo Boneriano. Partido MPB ta gradisi Joselito i Renata pa e trabou ku nan a bin ta ehersé den konseho insular den e último añanan pa MPB i ta deseá e miembro nan ku ta asumí funshon nan nobo hopi éksito.
