Durante e seminario di liderazgo femenino ‘Strong women choose to challenge’ na Universidad di Aruba, Minister Maduro a brinda un bista riba e inclusion financiero di e hende muhe na Aruba. E mandatario a trece dilanti cu den sector publico na Aruba tin hopi hende muhe den posicion financiero haciendo un trabou importante pa nos Pais.
Te ainda dos Minister di Finansa femenino
Minister Maduro a trece dilante cu te ainda den gobernacion, nos a conoce dos dama cu a asumi e posicion di Minister di Finansa di nos Pais. Aruba su promer Minister di Finansa ta sra. Ella Tromp-Yarzagaraay, kende alabes tabata Aruba su promer hende muhe Minister Plenipotenciario na Hulanda y Aruba su di dos Gobernador Interino femenino. Na aña 2017, Aruba a conoce un otro hende muhe como Minister di Finansa den persona di su persona, sra. Xiomara Maduro.
Tin hopi hende muhe den posicion clave den Gobierno
E mandatario a splica cu tin hopi hende muhe den posicion financiero cu ta clave den sector publico y den Gobierno. Asina por aprecia cu tin hende muhe na timon di Aruba su Banco Central, Departamento di Impuesto, Departamento Economico, Controlaria General y den posicion nan financiero clave na Departamento di Finansa, Departamento di Estadistica y na Aduana. Minister Maduro a indica cu e lista aki ta un resumen chikito di un lista mas amplio, ya cu den Gobierno y sector publico tin hopi mas hende muhe cu ta haci un trabou importante den funcionnan financiero na bienestar di comunidad.