Helicopter di Kustwacht mester a bay duna asistencia dos biaha pa personanan cu tin mester di asistencia medico. E prome melding a tuma luga durante oranan di mainta na Rescue and Coordination Center (RCC) di Kustwacht unda cu dos turista cu tabata riba Christoffelberg lo mester a cay for di un distancia basta largo bin abao.
Brandweer a presenta na e sitio y a avisa cu tabata imposibel pa e turistanan por subi bay ariba bek. Di e manera aki asina cu brandweer no por a haci nada mas Kustwacht a notifica e helicopter y na unda cu nan a prepara pa sali bay den direccion di Christoffelberg pa asina yuda e dos turistanan aki cu tabata dificil pa nan a subi bek. E dos turistanan uno ta hende homber y uno hende muhe a keda transporta cu helicopter di kustwacht pa aeropuerto Hato unda cu tabatin un ambulance na e sitio ta warda nan tur dos y asina transporta nan pa hospital.
Despues den oranan di media Kustwacht ta haya un otro melding unda cu mester a sali pa un situacion medico di urgencia. Aki ta trata di un otro turista cu tabata riba klein Corsou cu lo a cay y na unda cu e la cay y haya basta sla na su rudia te cu e la habri esaki. E persona cu a yama a haci peticion pa haya asistencia di e helicopter di Kustwacht pa asina por transporta e turista pa hospital. Mesora RCC a duna notificacion pa e helicopter bay duna e asistencia aki na klein Corsou pero cu lo mester a hiba e persona na aeropuerto di Corsou unda cu lo tin un ambulance ta wardando riba dje pa transporta e turista pa hospital. Personal di Kustwacht ta desea pronto recuperacion na e dos turistanan aki.
