Heart-Centered Leadership Foundation (HCLF) ta entusiasma pa anuncia su iniciativa nobo pa
sostene hobennan den nan desaroyo personal. Recientemente HCLF a habri su mesun “Club House”,
un espacio nobo na Teresita Center unda hobennan por bin hunto y tambe participa den un variedad
di actividadnan cu ta diseña pa yuda nan discubri ken nan ta y kiko nan kier den bida.
HCLF a uni forsa cu Kinderpostzegels, un organisacion conoci na Hulanda, pa lansa un proyecto
innovativo: the “Impact Club”. E programa aki ta uno piloto, parcialmente funda door di
Kinderpostzegels, cu ta representa un stap dilanti importante pa ofrece actividadnan significante y
regularmente pa hobennan. E programa piloto aki a cuminsa cu un sesion “think tank”, unda HCLF a
inclui un grupo di hoben pa vocifera nan ideanan y aspiracionnan, cual a directamente influencia e
diseño di e programa.
Impact Club ta inclui actividadnan interactivo pa hobennan di 13 pa 17 aña cu lo core di september te
cu december 2024. E structura di e programa ta consisti di 3 actividad pa luna cu lo tuma luga riba
Diadomingo. Durante e programa, e hoben lo embarca riba un trayectorio di descubrimento y
formacion personal. Cu enfoke riba bienestar mental positivo, e actividadnan interactivo lo promove
desaroyo di habilidadnan esencial manera compronde y maneha emocion, miho comunicacion,
pensamento critico y expresion den un manera mas creativo. Tur esaki cu e meta principal di yuda e
hoben tin mihor confiansa propio, autoestima y un sentido di proposito, cual na final por tin un efecto
riba e hoben su comportacion na cas y na scol.
“E Impact Club ta mas cu djis un serie di actividadnan; e ta un oportunidad pa hobennan conecta,
crece, y haci un impacto positivo den nan bida y den comunidad” a remarca Deanna Lampkin, trahado
hubenil na Heart-Centered Leadership Foundation.
Mayornan y hobennan, si bo ta interesa, esaki ta un gran oportunidad pa un programa positivo pa
hoben cu ta promove desaroyo personal. Join Impact Club su programa di 3 luna pa diferente
actividad cu lo yuda hobennan conecta cu otro y amplia nan habilidadnan.
Pa mas informacion tocante HCLF, e Impact Club, y con pa forma parti di esaki, por tuma contacto cu
HCLF na 5841211 (tambe HCLF su liña di whatsapp) of bishita nos Facebook page Heart-Centered
Leadership Foundation.
Tocante HCLF:
Heart-Centered Leadership Foundation (HCLF) ta un fundacion cu a keda estableci na 2008 cu e
meta pa inspira y empodera hobennan di Aruba. Desde 2012 e fundacion ta ofrece diferente tayer,
actividad y seminario unda hobennan ta haya oportunidad pa desaroya nan caracter y habilidadnan cu
ta fortifica nan desoroyo personal y profesional.
Heart-Centered Leadership Foundation ta Lansa Programa Nobo ‘Impact Club’.
