Health Week 2023 na La Cabana Beach Resort & Casino tabata hopi exitoso

Harmonia entre responsabilidad personal y profesional ta importante!

 E evento anual Health Week a cuminsa cu hopi entusiasmo hunto cu Centro di Desaroyo kende brinda un presentacion informativo riba e topiconan importante relaciona cu e balans entre trabao y bida diario. Nan expertisio y narativo atractivo a captura e audiencia mientras cu nan tabata comparti storianan personal y strategianan practico pa haya e harmonia entre responsabilidadnan profesional y personal. E sesion a enfatisa e importancia di por tin restriccion, prioridad riba cuido di bo mes, y promove comunicacion abierto. E participantenan a wordo inspira, arma cu conocemento pa nabega e ruta continuo di balans entre trabao cu bida. E presentacion a habri un siman hopi motivante yena cu actividadnan saludabel y tayernan cu e meta pa promove bienestar general.

Health Week Day 2 a cuminsa cu un presentacion por medio di Igor Croes di Technodent, discutiendo e bentahanan den usa EMA, Elastic Mandibular Advancement. Igor Croes a subraya cu EMA ta yuda individuonan identifica y adresa problemanan pa drumi manera grinding di bo djente, clenching of roncamento, yegando na loke ta un mehoracion di e calidad di drumi. Ora cu bo por drumi miho, bo ta experiencia un aumento den nivelnan di energia, funcion cognitivo, miho regulacion di bo humor y aumento den productividad na trabao. EMA tambe ta promove un miho relahacion di musculo durante drumimento, reduciendo tension y posibilidad di desaroya malesanan relata na drumimento. Concluyendo, e presentacion a enfatisa e importancia di EMA den loke ta e calidad di drumi y bienestar general.

E Health Week a continua cu un atardi dedica na ‘Rejuvenating Sessions’ of yoga sinta, conduci pa Sophia Slegers. Sophia a guia nos empleadonan haci diferente stretch, ehercicio den halamento di rosea, y tecnica di meditacion. E atmosfera sereno a crea un setting ideal pa participantenan por reconecta cu nan curpa y mente.

Adicionalmente, Centro Di Desaroyo Humano a duna un presentacion hopi informativo riba e tema di termento na trabao, of ‘workplace bullying.’ E presentacion a enfatisa riba diferente forma di termento cu por sosode na pia di trabao, su impacto na e bienestar y productividad di empleadonan, y strategianan di prevencion y intervencion. Centro di Desaroyo Humano a brinda guia  den loke ta e reconocemento di e comportacion aki y con pa adresa esaki, enfatisando tambe riba e importancia di desaroya un ambiente laboral respectivo y inclusivo. Nan a comparti tambe recursonan hopi balioso y gruponan di sosten obtenibel na empleadonan cu lo por ta experienciando esaki of lo kier raporta algun incidente.

La Cabana Beach Resort & Casino recientemente a bira socio cu Centro di Desaroyo Humano anto introduci e Associates Assistance Program manera un beneficio adicional. E programa ta diseña pa brinda sosten na empleadonan di e resort y nan miembronan di famia. E ta ofrece un variedad di servicio y recurso pa asina asisti nan durante temponan dificil y promove bienestar general. Empleadonan y nan sernan keri por beneficia hopi di e tipo di programanan aki pa asina tin acceso na e sosten cu nan mester ora cu nan mester.

Pa finalisa Health Week, empleadonan tabata tin e oportunidad pa priorisa nan salud fisico por medio di conduci check-ups na sitio. Empleadonan certifica, cu training den monitoria proceduranan di salud, a prepara algun areanan na unda cu empleadonan por a bay midi nan presion y check nan nivel di glucose.
Empleadonan tambe a wordo brinda e oportunidad pa por haya un evaluacion di nan vision y ricibi consehonan pa loke ta salud di nan wowo danki na Optica Oduber & Kan.

La Cabana Beach Resort & Casino kier extende su maximo gratitud na tur presentador cu a comparti nan conocemento y expertisio na e comision TLC y departamento di recurso humano pa nan organisacion excepcional y coordinacion di actividadnan di Health Week 2023. Hunto, nos a haci un diferencia significante den promove un ambiente laboral mas feliz y saludabel pa un y tur.