Fundacion Museo di Antiguedad nos Bieunan Aruba (FMANBA) ta presenta na pueblo di Aruba un evento di ‘Hazaña Mega Museo Aruba 2021. Nan a bin ta prepara pa e tremendo Hazaña di Henry ‘Heintje’ Ras, kende lo bay haci e hazaña aki door di keda 100 dia den e Cuebanan di Mas Grandi di Aruba, cu ta e Mina di Fosfaat p’asina recauda fondo p’e Mega Museo Aruba (Fundacion Museo di Antiguedad nos bieunan).
Sr. Henry ‘Heintje’ Ras tin basta aña caba ta haci tournan den Mina di Fosfaat, tanto pa nos hendenan local y turista.
Tabata na aña 1873 cu Sr. J.H. Waters Gravenhorst a descubri Fosfaat na Sero Colorado y na Sero Colebra. E tempo aya cu e trein di ARUBA PHOSPHAAT MAATSCHAPIJ (AFM) cu a wordo funda den december na aña 1879 tabata transporta e fosfaat pa e barconan. Un total di 20 Wagon a ser uza pa transporta e Fosfaat. A traha un rail di tram di 6 kilometer for di e Mina na Sero Colorado te na e waf di San Nicolas p’asina transporta e fosfaat p’e wordo exporta den barconan di bela pa Francia, Inglatera, y Spaña.
E Fosfaat tabata tin Acido Fosforico den dje, di cual el a wordo uza como e.o. Fertilisante pa mata. Pa 15 aña fosfaat a wordo saca fo’i Aruba y a exporta esaki.
Esaki ta djis un tiki di e historia. Sr. Henry ‘Heintje’ Ras semper ta bisa: E muchanan y pueblo di Aruba tin derecho di sa di nos historia!
Awo nos ta dilanti di un evento cu lo ta e Hazaña Mega Museo Aruba 2021 caminda cu Sr. Henry ‘Heintje’ Ras, kende for di hopi aña caba banda di ta un bombero di profesion, ta un coleccionista di artefacto y obhetonan hopi anticua y historico. Tambe e tin un coleccion di varios auto clasico y di basta aña bieu. Pa medio di tur e coleccionnan aki su cas a bira un cas museo. Riba dia 3 di mei 2019 el a funda Fundacion Museo di Antiguedad Nos Bieunan Aruba cu ta situa na su propio cas na Rooi Master # 5-E na Brazil.
Sr. Heintje Ras tin un deseo, un soño, un pasion di colecciona articulonan, artefacto y obhetonan hopi anticua y historico, manera disconan, tocadisco, diferente hero di strica, telefonnan, camaranan, mashin di mula, mashin di cose, etc. y su cas a bira chikito pa tur e inventario cu e tin di coleccionnan bieu.
E Hazaña Mega Museo Aruba 2021 ta e evento cu Sr. Heintje Ras ta desea di realisa no solamente pa recauda fondo pa yega na su edificio di Mega Museo Aruba, sino tambe pa pone Aruba su nomber na laira. Esaki door di haci e hazaña aki tambe ta pa kibra recordnan mundial internacional den e buki di ‘Guinness World Records’. E grupo aki ta consisti di boluntarionan cu ta apoyando y preparando esaki pa Sr. Heintje logra su soño di un Mega Museo. Sr. Ras lo bay ta keda 100 dia den e Mina di Fosfaat na Sero Colorado, bou di tera den e tunnel di e mina na unda cu lo e drenta dia 2 di october 2021 y sali riba dia 9 di januari 2022 pa kibra e record mundial. E ekipo ta conta masahistanan, sr. Willy Willems y nutricionista profesional, sr. Rene Wild, kende ta certified personal trainer y precision nutrition level 1 y 2 nutricionista, su huisarts, ex-hefe di bombero, sr. Jaime Lacle, kende ta pensionado, Director di BRA, sr. Rino Hermans y su Departamento lo haci un training durante e hazaña y boluntarionan balente.
E organisadonan ta spera cu pueblo di Aruba y tur sectornan y apoya e yiu di tera aki den su hazaña pa logra e fondonan pa realisacion di un Mega Museo Aruba.
For di awo caba lo por cuminsa na haci donacionnan online riba e cuenta di Banco RBC # 7700000100257292 of yama 7330270 of 5632121.
Janiro ‘Ataniro’ Eisden lo percura pa e eventonan musical durante e 100 dianan y nan ta spera cu artistanan grandi lo forma parti y apoya e evento aki. Na mesun momento ta gradici sra. Kamini Kurvink, kende a acepta mesora pa e luga Kamini’s Kitchen ta e cede di encuentro y reuni cu prensa tanto local como internacional. E bon noticia aki pa Aruba lo crea un union fuerte den nos comunidad Arubano.
Na nomber di Fundacion Museo di Antiguedad Nos Bieunan Aruba y staf di Hazaña Mega Museo Aruba 2021 nos ta desea Sr. Henry ‘Heintje’ Ras tur clase di exito!
