E negoshi tereno di pais Aruba ta algo cu a cuminsa hopi aña pasa, bou di gobierno di MEP, tempo di e minister di infrastructura e tempo ey, y a sigui bou gobiernonan di AVP. Caso Avestruz ta concentra riba e manipulacionnan cu tabatin cu tereno bou di gobiernonan di asignatura berde y cual por a tuma luga debi na un falta di control y buraco den leynan existente.
Avestruz despues di casi 2 aña di investigacion, cu ta menos cu e caso di IBiS den cual Paul Croes di AVP ta envolvi, a produci su prome detencionnan. E prome tabata Rebecca Richardson, riba diadomingo, sigui pa Jeff Franken, riba dialuna, y Leoncita Arends (mama di Rebecca), riba diamars.
Loke mester realisa den e caso aki ta e forma con ta move despues cu un persona haya e tereno. Segun por a compronde, Leoncita of otronan ta bay busca un tereno comecial pa desaroya un proyecto. E minister ta firma cu e no tin problema pa e persona haya e tereno y unabes cu tereno ta den man di e persona, e ta bende esaki pa suma hopi grandi. Of si e persona busca un benta pa e tereno, e ta haya su comision tambe.
E por sosode cu un NV cu a haya un tereno comercial ta pasa den un contratiempo of dificuldad of ta confronta cambio di plan despues di obtene un tereno comercial. E por opta di transpasa e sharenan di e compania pero semper y cuando e pidi y haya autorisacion di e minister di Infrastructura. Of, e por opta pa un prijsgeving si kier transpasa e tereno pa otro NV.
Pero e ta bira un problema ora cu esaki bira un modus operando, esta pidi, haya y bende tereno den forma di haci negoshi. Y esaki autoridadnan ta sospecha cu Leoncita Arends tabata haci, uzando diferente miembro di su famia of amistadnan. Of ta pidi un tereno cu un otro persona ta buscando y despues cu hay’e ta bira bende cu e persona, sacando sumanan grandi di placa. Tur esaki ta loke autoridadnan ta investiga pa mira si tin e pruebanan pa hiba e caso dilanti.
Loke ta cuestiona den e asunto aki ta cu na momento cu un persona haya un tereno comercial, e mester demostra cu e tin e recursonan financiero pa cumpli cu e exigencia di desaroya esaki den tanto tempo. Esaki ta normal pasobra un tereno comercial tin un balor grandi y no ta dun’e na ningun persona pa saca probecho sin inverti den dje.
Na momento cu un mas persona haya un tereno comercial y bende esaki pa saca probecho e ta bira castigabel. Y tur esnan envolvi cu a coopera den esaki tambe, y incluso esnan cu a haya Finders Fee (comision), cu ta normal ora un persona actua di intermediario pero no ora cu ta trata di un negoshi ilegal cu tereno di pais Aruba.
T’asina ta caminda cu a surgi caso Avestruz y despues a constata esaki tambe den caso Flamingo.
Te ainda no tin ningun politico cu a cay, pero no ta descarta cu despues di e prome tres detencionnan, e siguiente pa haya bishita di Landsrecherche por ta ex-Minister di Infrastructura.