Presencia reunion di 27 di juni den parlamento pa mira cua parlamentario ta para pro of contra pa haya indexering, reparatietoeslag pa pensionadonan y gehandicaptenuitkering
Reunion den parlamento pa trata cambionan den e presupuesto supletorio tabata mucho largo y no a termina pero lo sigui dia 27 di juni 2024 den parlamento. Segun parlamentario Hendrik Tevreden e reunion tabata mas bien un largamento di e proceso pa no yega na un votacion pa no cumpli cu trahadonan publico principalmente.
E esencia di e ley ta pa indexering unda cu gobierno a logra dia 29 di April yega na un acuerdo publico pa trece un aumento substancial pa nan cu lo keda parti den dos fase unda cu e prome parti ta awo y e di dos parti ta januari 2025 cu lo aumenta 11.7% riba nan salario. Parlamentario Hendrik Tevreden ta kere cu esaki ta husto mirando e poder di compra cu a bay perdi , e indexering aki ta haci e trabou ey unda cu ta lanta nan bek y ta den nan nivel di bida bek.
No mester lubida cu netamente e grupo aki ta e grupo cu gobierno di Aruba a yama riba nan durante di e pandemia di COVID, e grupo aki ta e grupo cu a para solidario cu gobierno di Aruba pero tambe cu e comunidad. Nos mester corda riba e polisnan cu tabata riba caya na momento cu nos tabata paden ,paramediconan den hospital trahando duro na momento cu e comunidad tabata paden, Douaneronan cu si mester a keda riba trabou, fundacionnan cu a percura pa nos grandi nan. E gruponan aki ta personanan cu gobierno mester considera y tambe aplica e ley pa asina nan por ricibi locual cu gobierno a propone nan.
Den e ley tambe ta haya cu fundacionnan ta haya 2.8 miyon cu ta keda poni pa nan y na unda cu cada fundacion mester percura pa e placa por yega den e salario di e trahado, pero tambe lo tin e reparatietoeslag ta keda aumenta, pension di SVB tambe lo aumenta y e gehandicaptenuitkering di e manera aki gobierno di Aruba ta purba di duna bek na e comunidad eingelijk locual cu ta haya na entrada.
Parlamentario Hendrik Tevreden ta lamenta cu durante di e reunion a bay den un direccion cu gobierno a trece medida a cobra belasting, pero un pais sano di su belasting e ta distribui den su pais e placa cu tin cu bay den caretera , scol ect ect.
Na e momentonan aki Aruba pa dos aña consecutivo tin un presupuesto surplus . Esaki ta significa cu parlamento ta haciendo su trabao di controla gobienro, tin un halfjaar reportage, voorjaar reportage, na jaars reportage, algo cu antes no tabata e caso. Awor parlamento tin control riba gobierno cuminsamento di aña , memey di aña y fin di aña pa asina parlamento tin bista con gobierno ta trahando cu placa di pueblo y con e ta alocando e placa di Pais Aruba.
E maneho aki a resulta cu ta ilustra e bon maneho di gobierno den un surplus 2 biaha y si mester sigui den e direccion aki lo yega e meta di baha e debe di 79% pa 70% mas lihe cu a premira. Tur e partinan aki ta positivo pa pais Aruba.
Den e mes un liña di pensamento aki e presupuesto supletorio a ricibi un resto di placa unda cu gobierno a bisa esaki lo keda destina pa e trahadonan publico. Esaki tabata e esencia di e reunion di cambio nan den e ley di presupuesto supletorio. Sinembargo parlamentario Hendrik Tevreden ta lamenta cu e reunion mes a cana den tur tipo di direccion unda cu a hunga politica partidista, politica personal, pero riba e esencia y contenido mes e reunion no a keda y pa e motibo aki mes e reunion a keda te cu 2:30 di madruga den sala y e reunion lo continua dia 27 di juni unda cu e ministernan so tin cu papia pa contesta e preguntanan cu a keda haci pa asina yega na un votacion.
Parlamentario Hendrik Tevreden ta kere cu ta importante pa pueblo , pero principalmente e ambtenaarnan mira e reunion di 27 di juni 2024 pa mira di bo mes cua ta e parlamentarionan cu ta para hunto cu bo pa abo como ciudadano ricibi locual cu bo ta merece, pa por haya bek un parti di e poder di compra cu a perde. E reunion di dia 27 di juni ta importante pa tur e ambtenaarnan, pero tambe e pensionadonan y e personanan cu ta ricibi gehandicaptenuitkering, indexering , tur e ciudadanonan aki parlamentario Hendrik Tevreden ta haci un peticion pa mira e reunion di dia 27 di juni 2024 y scucha con ta bay ta e votacion di parlamentarionan y kico ta nan rason cu nan ta vota sea pro of contra.
Ta importante pa e pueblo cu ta scoge pa parlamentarionan pa nan mira tambe si berdaderamente e parlamentario cu nan a scoge pe ta para nan banda of si ta para den banda unda cu ta haci politica partidista y politica personal cu ta hiba Pais Aruba den un decadencia y no den progreso cu ta buscando pa Pais Aruba.
