E ta wordo poni responsabel cu grupo Ausoma pa falta di informacion a perde opcion riba terenonan
Den transcurso di dialuna ta hopi informacion a bini dilanti di e forma con Haime Croes di DIP a perhudica Aruba. A perhudica Aruba di haya un joya di un proyecto universitario di facultad di medicina, mescos manera uno cu tin na Boneiro.
E grupo Ausuma a bin ta trahando riba nan meta pa establece un Universidad di Medicina na Aruba, hustamente dirigi riba grupo di studiantenan cu kier haci nan soño bira realidad, di bira un dokter. Kanaan Baroud den un declaración duna a papia di e tardansa pa realisa nan proyecto, obstaculonan poni den nan caminda, sin cu nan ta comprende pakico y e situacion ta bira asina serio cu nan por perde e inversión cu nan a haci pa establece un universidad di medicina na Aruba.
E tin tres aña caba den combersion cu Gobierno y nada ainda. Nan por te awo pasobra e lesnan ta tumando luga online pero na september awo ta bay haya problema ora cu e lesnan cuminsa di forma presencia. “Nos mester di mas espacio,” el a enfatisa.
Conseho di Minister ya caba a duna aprobación na DIP pa negocia cu e grupo di AUSOMA pa nan haya edificionan di Juliana School of Beatrix School. Ta papia aki di un huur overeenkomst. E problema ta sinta cu Gobierno por negocia acuerdo di huur pa cinco aña so. Pa mas largo lo mester bay Parlamento. Baroud ta splica cu e inversión cu mester haci den e edificionan aki ta hopi grandi y no tin sentido pa huur esaki pa 5 aña. Sea Gobierno mester paga nan bek of haci e termino mas largo.
Sin embargo DIP no a cumpli cu e mandato aki. Si e director a duna nan e opcion di duna nan e opcion pa haya den erfpacht. Esaki ta algo cu lo cumbini e grupo Ausoma hopi mas. Banco no ta financia nan pa un edificio cu nan ta huur. Eynan ta caminda e asunto a pega.
Aña pasa juli a haya e opcion pero mester a cumpli cu tur e rekisitonan cu a vence dia 7 di januari. Loke el a cuestiona ta cu e opcion cu el a haya for di DIP ta algo cu a mira for di prome instante cu lo no por cumpli cu esaki.
El a sinti cu nan a want’e na liña y no kier a dun’e tur informacion pa e por traha su Business Plan. “Nunca mi a haya e informacionnan ey ni cuanto email of correspondencia mi a manda pa e director. Tristo ta cu DIP, cu no a coopera, ta manda informa nan cu e opcion a caduca pasobra no a cumpli cu e rekisitonan. “Mi ta haya hopi iresponsabel pa bisa mi algo asina si no ta ami, pero abo no a cumpli pa duna informacion. Esey a y tas troba nos.”
Si e proceso na DIP a cana di e forma correcto, pa september aworaki nan campus lo tabata cla sigur. Juliana School lo a bira e Medical School y Beatrix School (Monumento) lo a bin e Undergraduate University / High School (diferente programa di certificación) cu tambe ta trahando riba dje. Ya caba a haci hopi inversión den e plan pa awo bin tende cu “nos no a cumpli”.
Mirando cu ta sinti cu henter e asunto aki no ta nan culpa, a dicidi di bay LAR. A manda un carta caba pa DIP. Pero no a tende nada mas di DIP. “Si mester bay Corte, ta bay Corte.”
E director simplemente no a ehecuta e idea cu e tabatin. E director a faya, pasobra nunca a duna nan e suma cu e acuerdo ta bal. E no sa pakico e director a actúa di e forma ey pero loke si e sa ta cu e no tabata e forma correcto. Ningun email of correspondencia a wordo contesta door di e director.
Baroud a bisa cu e ta busca solución. Si tin otro plan cu e edificionan aki, bis’e pero no keda sin contesta pa despues si manda un carta cu e opcion a caduca. Riba dje, e carta di DIP ta bisa cu e no tin derecho ni di haci un obheccion. Algo incomprendibel.
E edificionan aki a wordo traha pa educación y e ta consciente cu tin otro partidonan cu tin hopi interés den e edificionan aki, pa haci condominiun probablemente. E edificionan …
