Caso Kukwisa un caso cu a cuminsa door di un keho duna door di Sospechoso Haime Croes director di DIP contra sospechoso Marisol Lopez Tromp. Di e manera aki Ministerio publico a cuminsa cu un investigacion y ta cana e caminda di ley y mester cana conforme e maneho di ministerio publico. A haci diferente entrada hudicial na diferente cas y departamentonan concerni cu ta den e caso.
Asina e caso Kukwisa a keda investiga unda cu a papia cu diferente testigonan y diferente interogacionnan a wordo haci. Den tur e proceso aki tambe a scucha sospecho Haime Croes y sospechoso Marisol Tromp.
E caso Kukwisa a conduci cu Landsrecherge mester a haci diferente investigacionnan den henter e sistema di DIP, otorgamento di huurgrond y algun empleadonan di DIP cu tambe a wordo scucha. Den henter e investigacion a resulta cu e declaracionnan cu sospechoso Haime Croes a declara no tabata cuadra cu realidad.
Informacion cu EA News ta disponi di dje cu den henter e caso aki a sali na cla tambe cu Haime Croes no ta apto pa e funcion como director di DIP, mirando cu e no ta compronde con e maneho di e departamento ta hinca den otro.
Consecuencia di tipo di acusacion asina no simplemente ta causa daño na e otro persona , pero ta causa daño na Pais Aruba cu ya caba a sufri hopi caba den e caso di Avestruz, Flamingo y awo Kukwisa. E declaracionnan falso duna door di e director di DIP Haime Croes cu no tin un bista con su departamento ta funciona a pone cu practicamente minister di infrastructura Evelyn Wever Croes tabatin su man nan mara cu no por a haci nada.
Den un forma di bisa cu e director tabatin e departamento di DIP secuestra y fuera di control cu ta stroba Minister di Infrastructura Evelyn Wever Croes di traha pa infrastructura y pa asina e economia por drei.
Ministerio publico tabatin un trabao grandi pa haci unda cu practicamente den tanto caso Avestruz, Flamingo y awo Kukwisa mester a investiga añanan tras di otro unda cu tabata stroba pa procesonan tuma luga mirando e investigacionnan grandi di cada caso cu tabatin.
Awe despues di varios aña cu Minister Evelyn Wever Croes tin e cartera di infrastructura cada bes ta resulta cu ta seponeer caso of ta perde caso. E pregunta magico ta kende ta keda responsabel pa e daño haci na LAND ARUBA, ken ta para responsabel na para un departamento completo di funciona pa haci investigacion, ken ta para responsabel pa tur proyectonan cu a keda para, ken ta para responsabel pa tur e mal decisionnan cu a keda tuma, pero principalmente pa tur e ganamento y entrega di denuncia falso cu a keda haci y cu a crea e casonan aki den DIP door di e director di DIP Haime Croes.
Banda di tur e puntonan aki esun cu a keda mas perhudica ta Pais Aruba, nos tur cu ta biba riba e pida baranca aki mester bay paga pa actonan di ambtenaarnan y den e caso aki ta Haime Croes director di DIP cu no sa fungi su trabao , of nan no ta apto pa e trabao of nan no kier sirbi nan pais manera LMA ta prescribi.
Loke cu mester ta bon cla cu e cartera di infrastructura ta e cartera di mas importante entre e otro carteranan cu tin. E cartera di infrastructura ta esun cu ta drey e economia di Aruba y den e caso aki debi na e investigacionnan cu mester a tuma luga door di keho duna door di director di DIP Haime Croes practicamente Haime Croes y Ministerio Publico a paralisa economia di Aruba completo unda cu hopi comerciante e sufri di esaki ,ciudadanonan tambe individual a sufri cu e investigacion nan aki.
Ta bisto cu director Haime Croes ta incapacita pa por maneha un departamento asina importante. Awo cu esaki a Sali na cla , ta necesario y di urgencia pa Prome Minister di Aruba Evelyn Wever Croes cu tin e cartera di infrastructura actualmente pa tuma accion mesora den e departamento di DIP y restaura e departamento por completo.
Na mes momento ta importante pa cuminsa cu un plan di atake pa ranca start nos economia den un forma positivo y cu hopi forsa pa cuminsa pone tur cos den ordo y tur esunnan cu tin derecho pa haya esaki tambe. Debi na e investigacionnan di Ministerio Publico y a mal informacion di director di DIP e mandatario actual Evelyn Wever Croes no por a traha pa su pueblo y tur e trancamento cu tabatin a haci un impacto fuerte na e economia di Aruba.
Loke ta bon cla tambe cu e departamento di DIP mes no a haci nada malo y e minister actual di DIP Evelyn Wever Croes tampoco no a haci nada malo , pero tampoco no por a traha. Tur e situacion cu tin actualmente e trankamento economico di DIP di tur e casonan Avestruz, Flamingo y awo Kukwisa ta debi na e mal maneho di minister nan di infrastructura anterior.
Un caso Avestruz cu nos tur sa e resultado, un caso flamingo cu no tin un bista real kico realmente ta e caso y awo caso Kukwisa un caso cu ta sali afo cu e director di DIP a gaña y perhudica OM y DIP pero principalmente cada ciudadano cu ta biba riba e pida baranca aki y sigur comerciantenan cu kier inverti den Aruba a keda perhudica.
Prome Minister Evelyn Wever Croes cu tin e cartera di infrastructura practicamente no por a traha debi na tur e investigacionnan, pero cu ta spera cu awo cu a sali na cla kico ta e posicion di Avestruz, Flamingo ainda falta pa rond af y Kikwisa cu no tin nada , awo cu tin claridad e mandatario mester sali padilanti y para pa su pueblo y cuminsa cu un structura na beneficio di Aruba den departamento di DIP.
Prome MInsiter Evelyn Wever Croes mester tuma accion mesora y pone hende nan cu capacidad y conocemento di infrastructura den DIP , pero principalmente un persona cu por maneha DIP conforme nos leynan y cu por drey e departamento manera pueblo merece di wordo trata.
Loke cu tambe ta un realidad aunke cu ministerio publico a seponeer e caso di Kukwisa esey no ta significa cu loke e politico Marisol Tromp a haci di campaña cu documentonan bao di su brasa unda cu ta pidi voto a cambio lo percura pa documentonan y terenonan Sali manera prome minister a bin ta indica den parlamento na varios ocasion, no ta significa cu Marisol Tromp ta integro y limpi.
Loke cu tambe ta un realidad ta e mes un Marisol Tromp aki a pidi y a pone pia abao pa Haime Croes bira director e tempo ey y a atende esaki directo cu un compania basta renombra cu supuestamente lo mester a evalua Haime Croes pa por haya e posicion di director na DIP, esaki ta ironia di bida of no ? Sinembargo manera bida semper a mustra nos na bida tur hende lo paga pa daño haci na otro y esaki ningun hende no ta scapa di dje.
