Presidente di Quota Club Juliska Harms a habri conferencia di prensa y ta anuncia cu a habri e siman pa cuido di oido. Esaki ta un siman cu Quota Club ta conscientisa comunidad riba cuido di oido. Esaki ta e di 35 anja cu ta haci e parti di conscientisacion aki y na unda tin 4 localidad cu ta test oido gratis pa comunidad di Aruba. Esaki ta un proyecto sumamente exitoso unda cu tur localidad ta yena y Quota Club ta super proud di por a haci e proyecto aki un biaha mas.
Stella Monsanto ta director of service na Quota Club a elabora mas riba e proyecto unda cu ta indica cu september ta e luna cu Quota Club ta organisa e campaña di conscientisacion pa cuido di oido, pero mundialmente tambe den e luna di september ta enfoca riba e cuido di oido.
Quota Club ta anuncia e siman cu por test y duna oportunidad na comunidad pa haci nan test completamente gratis. E anja aki un biaha mas por a conta cu e sosten di 4 test center cu lo bay haci e test di oido unda cu ta copera cu Quota Club pa e anja aki ta trata aki di SVB San Nicolas , The specialist, FEPO y Aruba Hiring Institute. Quota Club Aruba ta cradici cada un di nan pa a habri nan porta un biaha mas pa asina duna e ayudo pa haci e test nan gratis.
Ta pidi comunidad pa yama haci un afspraak na un di e 4 localidad nan , sin un afspraak no lo por wordo yuda. Importante ta pa yama debi cu tur anja a cuponan ta yena hopi lihe y importante ta pa no perde oportunidad. Por cuminsa yama desde awe te cu dia 20 di september pa asina por haya un afspraak.
Tambe loke cu ta hopi importante ta cu personanan cu a yega di haci un test caba y of cu ta cliente di un di e test center nan no lo mester haci e test aki mas. Dia 20 di september ta cera pa por haya un afspraak pa haci test di oido pa asina dialuna dia 23 di september ta cuminsa cu e testnan pa e hende nan cu a haya un afspraak.
Quota Club kier haci un invitacion special na e hobennan pa bin haci e test, tuma un poco tempo pa bo mes y haci bo oido. Como hoben ta importante pa check e oido pa asina sa si e ta bon of mester di ayudo avansa. Quota Club ta duna importancia tur aña pa control di oido , esaki ta debi cu aña tras di aña e cantidad di persona cu tin perdida cu nan oido ta creciendo , tin persona cu tin perdida un banda y tin persona cu tin perdida tur dos banda.
Perdida di oido ta un problema serio si e no keda atendi na tempo. Loke cu hopi di nos mester sa ta cu como persona si tin perdida di oido y no atende esaki na tempo e calidad di bida ta bay atras unda cu poco pa poco e circulo di famia y amistad ta bira chikito unda cu ta bira mas y mas dificil pa scuhanan bon y tin momento e amistadnan no ta comprondebo tampoco. Tur e señalnan aki por conduci cu e persona ta cay den isolacion ,sigui pa depresion y probablemente por conduci na problema mental.
Esaki ta e puntonan cu mester tene cuenta cu ne y bay haci e test di oido pa asina sa si e oido ta bon of si ta na tempo pa haya ayudo avansa. Mas tarda mas atras e oido ta bay.
